ବିଶ୍ୱ ବାଣିଜ୍ୟ ସଂଗଠନ(WTO) ଭାରତଛାଡ ଦାବିରେ ଚୁକ୍ତିନାମା ପୋଡିଲେ ବିକ୍ଷୋଭକାରୀ: ସଂଯୁକ୍ତ କୃଷକ ମୋର୍ଚ୍ଚାର ଗଣ ପ୍ରତିବାଦ

ଭୁବନେଶ୍ୱର, ତା ୨୭/୦୨: ଫେବୃଆରୀ ୨୬ରୁ ଫେବୃଆରୀ ୨୯ ପର୍ଯ୍ୟନ୍ତ ଆବୁଧାବି ରେ ହେଉଥିବା ବିଶ୍ୱ ବାଣିଜ୍ୟ ସଂଗଠନ( WTO) ର ମନ୍ତ୍ରୀ ସ୍ତରୀୟ ସମ୍ମିଳନୀ ବିରୋଧରେ ସଂଯୁକ୍ତ କୃଷକ ମୋର୍ଚ୍ଚା ଡାକରାରେ ଆଜି ଦେଶବ୍ୟାପୀ ପ୍ରତିବାଦ ପ୍ରଦର୍ଶନ କରାଯାଇଛି | ଦେଶୀ ଓ ବହୁ ଦେଶୀୟ କମ୍ପାନୀ ମାନଙ୍କ ସ୍ୱାର୍ଥରେ କୃଷକ ଓ ଶ୍ରମିକ ବିରୋଧୀ ନୀତି ଗ୍ରହଣ କରିବା ପାଇଁ ବିଭିନ୍ନ ଦେଶର ସରକାର ମାନଙ୍କ ଉପରେ ଅବାଞ୍ଛିତ ଚାପ ସୃଷ୍ଟି କରୁଥିବାରୁ ଅବିଳମ୍ବେ ବିଶ୍ୱ ବାଣିଜ୍ୟ ସଂଗଠନ ଭାରତ ଛାଡ଼ିବାକୁ ସଂଯୁକ୍ତ କୃଷକ ମୋର୍ଚ୍ଚା ପକ୍ଷରୁ ଦାବି କରାଯାଇଛି। କୃଷକ ମାନଙ୍କର‌ ଉତ୍ପାଦିତ ଶସ୍ୟର ସର୍ବନିମ୍ନ ସହାୟକ ମୂଲ୍ୟ ଦେବା ଓ ତାହାକୁ ଆଇନଗତ ମାନ୍ୟତା ପ୍ରଦାନକୁ ବିରୋଧ କରିବା, ସାର୍ବଜନୀନ ବଣ୍ଟନ ବ୍ୟବସ୍ଥା ଉପରେ କଟକଣା ସୃଷ୍ଟି କରୁଥିବାରୁ ସଂଯୁକ୍ତ କୃଷକ ମୋର୍ଚ୍ଚା ଏହାର ତୀବ୍ର ପ୍ରତିବାଦ କରୁଛି। ସେହିପରି ଘରୋଇ ଉତ୍ପାଦକ ମାନଙ୍କୁ ସୁରକ୍ଷା ଦେବା, ଖାଦ୍ୟ ସୁରକ୍ଷା ସୁନିଶ୍ଚିତ କରିବା ଦିଗରେ ବାଣିଜ୍ୟ ପ୍ରତିବନ୍ଧକ ସୃଷ୍ଟି କରୁଥିବାରୁ ବିଶ୍ବ ବାଣିଜ୍ୟ ସଂଗଠନରୁ ଭାରତ ସରକାର ଓହରି ଆସିବା ପାଇଁ ସଂଯୁକ୍ତ କୃଷକ ମୋର୍ଚ୍ଚା ପକ୍ଷରୁ ଦାବି କରାଯାଇଛି।
୨୦୩୪ ଶେଷ ସୁଦ୍ଧା କୃଷି ସହାୟତା କ୍ଷେତ୍ରରେ ବିଶ୍ୱ ବାଣିଜ୍ୟ ସଂଗଠନ ସଦସ୍ୟ ଦେଶ ଗୁଡିକ ୫୦% ହ୍ରାସ ପ୍ରସ୍ତାବକୁ ସେମାନେ ବିରୋଧ କରୁଛନ୍ତି ଏବଂ କୃଷି କ୍ଷେତ୍ରକୁ ଏହି ଚୁକ୍ତି ବାହାରେ ରଖିବାକୁ ସେମାନେ ଦାବି କରିଛନ୍ତି।
ସାର୍ବଜନୀନ ଯୋଗାଣ ବ୍ୟବସ୍ଥା ପାଇଁ ଖାଦ୍ୟ ସାମଗ୍ରୀ ଗଚ୍ଛିତ କରିବା (ଷ୍ଟକ୍ ହୋଲ୍ଡିଂ) ପ୍ରସଙ୍ଗ ଭାରତ ପାଇଁ ଅତ୍ୟନ୍ତ ଗୁରୁତ୍ବପୂର୍ଣ୍ଣ ଅଟେ, ବିଶେଷକରି କୃଷକ ଏବଂ ଶ୍ରମିକଙ୍କ ପାଇଁ ସର୍ବନିମ୍ନ ସହାୟକ ମୂଲ୍ୟ ( ସି ୨ + ୫୦%) ସ୍ଥିର କରାଯିବା ଏବଂ ସମସ୍ତ ଚାଷୀଙ୍କ ପାଇଁ ଏହାକୁ ଏକ ଆଇନଗତ ଗ୍ୟାରେଣ୍ଟି ପ୍ରଦାନ ଆବଶ୍ୟକ| କିନ୍ତୁ ବାସ୍ତବ କ୍ଷେତ୍ରରେ ଭାରତର ୯୦ % କୃଷକ ଏହି ବ୍ୟବସ୍ଥାର ବାହାରେ ଅଛନ୍ତି ଏବଂ ତୀବ୍ର କୃଷି ସଙ୍କଟ ଏବଂ ଋଣ ଭାରର ସମ୍ମୁଖୀନ ହେଉଛନ୍ତି। ମୋଦି ଶାସନର ଦଶ ବର୍ଷ ମଧ୍ୟରେ ବେରୋଜଗାରୀ, ଦାରିଦ୍ରତା ଏବଂ ଗ୍ରାମାଞ୍ଚଳରୁ ସହରାଞ୍ଚଳକୁ ସ୍ଥାନାନ୍ତରଣର ବିଷମୟ ପରିଣାମ ଗ୍ରାମାଞ୍ଚଳରେ ବିପଦପୂର୍ଣ୍ଣ ପରିସ୍ଥିତି ସୃଷ୍ଟି କରିଛି | ଭାରତ ସରକାର ଏହାର କୃଷକମାନଙ୍କୁ ସୁରକ୍ଷା ଦେବା ଏବଂ ଜାତୀୟ ଖାଦ୍ୟ ନିରାପତ୍ତା ନିଶ୍ଚିତ କରିବା ପାଇଁ ଦେଶର ଅଧିକାରକୁ ଦୃଢ ଭାବରେ ରକ୍ଷା କରିବା ଆବଶ୍ୟକ। କୋୖଣସି ଆନ୍ତର୍ଜାତୀୟ ଅନୁଷ୍ଠାନ କିମ୍ବା ଚୁକ୍ତିନାମା ଏହି ପଥରେ ପ୍ରତିବନ୍ଧକ ସୃଷ୍ଟି କରିବାକୁ ଅନୁମତି ଦିଆଯାଇପାରିବ ନାହିଁ ବୋଲି ସେମାନେ ଯୁକ୍ତି କରିଛନ୍ତି | ଭାରତର ଜାତୀୟ ଖାଦ୍ୟ ସୁରକ୍ଷା ବ୍ୟବସ୍ଥା – ଏମ୍.ଏସ୍.ପି ଏବଂ ସାଧାରଣ କ୍ରୟ ବ୍ୟବସ୍ଥା ଏବଂ ଜାତୀୟ ଖାଦ୍ୟ ସୁରକ୍ଷା ଆଇନ ମାଧ୍ୟମରେ ଶସ୍ୟ ବଣ୍ଟନ – ଡବ୍ଲୁଟିଓରେ ବାରମ୍ବାର ବିବାଦର ବିଷୟ ହୋଇଛି। ବିକଶିତ ତଥା ପ୍ରମୁଖ ରପ୍ତାନିକାରୀ ଦେଶଗୁଡିକ କୃଷି କ୍ଷେତ୍ରରେ ଜନସାଧାରଣଙ୍କ ଭାଗିଦାରୀକୁ ଆହୁରି ହ୍ରାସ ପାଇଁ ପ୍ରସ୍ତାବ ଦେଇଛନ୍ତି। ଏହିପରି ପ୍ରସ୍ତାବକୁ ଭାରତ ଏବଂ ଅନ୍ୟାନ୍ୟ କମ୍ ବିକଶିତ ଦେଶ ଦୃଢ ଭାବରେ ପ୍ରତ୍ୟାଖ୍ୟାନ କରିବା ଆବଶ୍ୟକ। କେତେକ ବିକଶିତ ଦେଶ ମାନଙ୍କ ସ୍ୱାର୍ଥ ସାଧନ ପାଇଁ ଶୁଳ୍କ ହ୍ରାସ କରି ରପ୍ତାନିକାରୀଙ୍କ ପାଇଁ ମୁକ୍ତ ବଜାର ବୃଦ୍ଧି ପାଇଁ ପ୍ରସ୍ତାବକୁ ମଧ୍ୟ ଭାରତ ଦୃଢ ବିରୋଧ କରିବା ଆବଶ୍ୟକ ବୋଲି ସଂଯୁକ୍ତ କୃଷକ ମୋର୍ଚ୍ଚା ମତବ୍ୟକ୍ତ କରିଛି ।

ସଂଯୁକ୍ତ କୃଷକ ମୋର୍ଚ୍ଚାର ଆହ୍ୱାନରେ ଆୟୋଜିତ ଆଜିର ପ୍ରତିବାଦରେ ବିଭିନ୍ନ କୃଷକ, ଶ୍ରମିକ ଓ ଗଣ ସଂଗଠନ ପକ୍ଷରୁ ସୁରେଶ ପାଣିଗ୍ରାହୀ, ମହେନ୍ଦ୍ର ପରିଡ଼ା, ଜ୍ୟୋତି ରଞ୍ଜନ ମହାପାତ୍ର,ସନ୍ତୋଷ ରଥ, ନରେନ୍ଦ୍ର ମହାନ୍ତି , ରାଧାକାନ୍ତ ସେଠି, ପ୍ରଶାନ୍ତ ପାଇକରାୟ, ନିରଞ୍ଜନ ମହାନ୍ତି, ଅଭିରାମ ବେହେରା, ଯତୀନ୍ ମହାନ୍ତି, ବଂଶୀଧର ପରିଡ଼ା, ଚାମ୍ବୁରୁ ସୋରେନ୍, ପ୍ରମୋଦିନୀ ସାହୁ, ଦିଶା ଆଜାଦ୍, ମହମ୍ମଦ ସୁକୁର୍, ଟୁନା ସ୍ୱାଇଁ, ଭୁବନାନନ୍ଦ ମହାପାତ୍ର, ଭାଗୀରଥି ବେହେରା , ଜଗଦୀଶ ଜେନା ପ୍ରମୁଖ ଯୋଗ ଦେଇଥିଲେ।