ମେଡିକାଲ ଶିକ୍ଷାରେ ନେକ୍ସଟ ଲାଗୁ କରିବା ପ୍ରତିବାଦରେ ସମ୍ ମେଡିକାଲ କଲେଜ ଛାତ୍ରଛାତ୍ରୀମାନଙ୍କର ବିକ୍ଷୋଭ

ଭୁନେଶ୍ଵର, ତା.୦୩.୦୭.୨୦୨୩- ଆଜି National Exit Test(NEXT)କୁ ପ୍ରତ୍ୟାହାର କାରିବା ଦାବିରେ ଆଇ. ଏମ୍. ସ୍ ଆଣ୍ଡ ସମ୍ ହସ୍ପିଟାଲର ଛାତ୍ରଛାତ୍ରୀମାନେ ଏକ ବିକ୍ଷୋଭ ପ୍ରଦର୍ଶନ କରିଛନ୍ତି। ଆଜିକାର ଏହି କାର୍ଯ୍ୟକ୍ରମରେ ଆଇ. ଏମ୍. ସ୍ ଆଣ୍ଡ ସମ୍ ହସ୍ପିଟାଲର ବିଭୂତି ଭୁଷଣ କର, ନିଖିଲ ଶର୍ମା, ଐଶ୍ୱର୍ଯ୍ୟା ରାଜଲକ୍ଷ୍ମୀ, ରୀଚା ମହାପାତ୍ର, ସୋନାଲ ସାମନ୍ତରାୟ ପ୍ରମୁଖ ନେତୃତ୍ବ ନେଇଥିଲେ ଏବଂ ବିକ୍ଷୋଭ ସ୍ଥଳରେ ଏଆଇଡିଏସଓ ଓଡିଶା ରାଜ୍ୟ ପରିଷଦର ଅଫିସ୍ ସମ୍ପାଦକ ନସିମ୍ ସରକାର ଉପସ୍ଥିତ ରହି ଆନ୍ଦୋଳନକୁ ଏଆଇଡିଏସଓ ପକ୍ଷରୁ ସମର୍ଥନ କରିଥିଲେ ।
ଏଠାରେ ଉଲ୍ଲେଖ ଯୋଗ୍ୟ ଯେ ନ୍ୟାସନାଲ ମେଡିକାଲ କମିଶନ (ଏନଏମସି) ଦ୍ୱାରା NEXT-1 ପରୀକ୍ଷା ତରବରିଆ ଭାବେ ଲାଗୁ କରିବା ଭାରତବର୍ଷର ଡାକ୍ତରୀ ଛାତ୍ରଛାତ୍ରୀଙ୍କୁ ଗଭୀର ଭାବରେ ଚକିତ କରିଛି । ଏକତରଫା, ଅଗଣତାନ୍ତ୍ରିକ ଏବଂ ଅବୈଜ୍ଞାନିକ ଭାବରେ NEXT ପରୀକ୍ଷା ଲାଗୁ କରିବା ଦ୍ୱାରା, ଏହା ଡାକ୍ତରଙ୍କ ଗୁଣବତ୍ତା ତଥା ଡାକ୍ତରୀ ଶିକ୍ଷାକୁ ମୃତ୍ୟୁ ମୁଖକୁ ଠେଲିଦେବ । ଏକପାଖିଆ ଭାବରେ ୨୦୧୯ ବ୍ୟାଚ୍ ଛାତ୍ରଛାତ୍ରୀମାନଙ୍କ ପାଇଁ ସେମାନଙ୍କର MBBS ପାଠ୍ୟକ୍ରମର ଶେଷରେ ଏକ ନୂତନ ପରୀକ୍ଷା ବ୍ୟବସ୍ଥା ଲାଗୁ କରିବା ଅଗଣତାନ୍ତ୍ରିକ ଏବଂ ଅନ୍ୟାୟସଂଗତ । ଛାତ୍ରଛାତ୍ରୀମାନଙ୍କ ଚାପଗ୍ରସ୍ତ ପରିସ୍ଥିତିକୁ ବିଚାର ନକରି NEXT ପରୀକ୍ଷାର କାର୍ଯ୍ୟକାରୀ କରିବାକୁ ତୀବ୍ର ବିରୋଧ କରାଯାଇଛି। ଏଠାରେ ପ୍ରଶ୍ନ ଉଠୁଛି ଯେ ଛାତ୍ରଛାତ୍ରୀ ଏବଂ ପ୍ରଫେସରମାନଙ୍କୁ ପ୍ରସ୍ତୁତ ହେବାକୁ ଆବଶ୍ୟକୀୟ ସମୟ ନ ଦେଇ ଏହି ପରୀକ୍ଷା କରିବା ପାଇଁ NMC କାହିଁକି ଏତେ ତତ୍ପର? ଛାତ୍ରଛାତ୍ରୀଙ୍କ ମାନସିକ ଦୁଶ୍ଚିନ୍ତାକୁ ହ୍ରାସ କରିବା ପାଇଁ ୱେବିନାର ଆୟୋଜନ କରାଯାଇଛି ବୋଲି କୁହାଯାଇଥିଲା । କିନ୍ତୁ, ବାସ୍ତବରେ, ୨୦୧୯ ବ୍ୟାଚ୍ ଛାତ୍ରଛାତ୍ରୀମାନଙ୍କ ପାଇଁ NEXT ଘୋଷଣା ପରେ ଏହା ଛାତ୍ରଛାତ୍ରୀମାନଙ୍କ ଉପରେ ଅଯଥା ମାନସିକଚାପ ଏବଂ ଦୁଶିନ୍ତା ସୃଷ୍ଟି କରିଛି । ବିଶେଷକରି ଅନ୍ତିମ ବ୍ୟାଚର ଛାତ୍ରଛାତ୍ରୀମାନେ ଅତ୍ୟଧିକ ଚିନ୍ତିତ । ଦୀର୍ଘ ବର୍ଷର ସୁପରୀକ୍ଷିତ ପରୀକ୍ଷା ପଦ୍ଧତିର ଢାଞ୍ଚା ଅନୁଯାୟୀ, ଶେଷ ବର୍ଷର ଛାତ୍ରମାନଙ୍କୁ ଚାରୋଟି ବିଷୟ ସହିତ ଅନ୍ତିମ MBBS ପରୀକ୍ଷା ଦେବାକୁ ପଡେ । କିନ୍ତୁ, ଏହି ନୂତନ NEXT ପାଠ୍ୟକ୍ରମ ଅଧୀନରେ, ସେମାନଙ୍କୁ ୬ ମାସରେ ୧୯ଟି ବିଷୟ ପାଇଁ ପ୍ରସ୍ତୁତ ହେବାକୁ କୁହାଯାଇଛି । ଅଧିକନ୍ତୁ, ସେମାନେ କ’ଣ ଅଧ୍ୟୟନ କରିବେ?, ପ୍ରଶ୍ନ ପତ୍ରର ଢାଞ୍ଚା କ’ଣ ହେବ? ସେ ବିଷୟରେ ଅନ୍ଧାରରେ ରଖାଯାଇଛି । ଆଶାକରାଯାଉଥିଲା ଯେ ଏହି ସଂପୂର୍ଣ୍ଣ ନୂତନ ପରୀକ୍ଷା ଆରମ୍ଭ କରିବା ପୂର୍ବରୁ NMC ଦେଶର ଡାକ୍ତରୀ ଛାତ୍ର, ଶିକ୍ଷକ ଏବଂ ଶିକ୍ଷାବିତ୍ ମାନଙ୍କ ମତାମତ ନେବ । ଏହା ଅତ୍ୟନ୍ତ ଦୁଃଖଦାୟକ ବିଷୟ ଯେ NMC ଏହି ଗଣତାନ୍ତ୍ରିକ ପ୍ରକ୍ରିୟା ଅନୁସରଣ କରିବା ପରିବର୍ତ୍ତେ ଏହାକୁ ଏକତରଫା ଲାଗୁ କରିବା ପାଇଁ ହୀନ ଚକ୍ରାନ୍ତ କରୁଛି।
ପୁନଶ୍ଚ, ୨୦୦୦ ଟଙ୍କାର ଅତିରିକ୍ତ ଶୁଳ୍କ ମକ୍ ଟେଷ୍ଟ ପାଇଁ ଚାର୍ଜ କରାଯିବ ବୋଲି ସୂଚନା ଦିଆଯାଇଛି, ଯାହା ଜୁଲାଇ ୨୮ରେ ଅନୁଷ୍ଠିତ ହେବ । ଯାହାର ଅର୍ଥ ହେଉଛି, ଏକ ମାସର ପ୍ରସ୍ତୁତି ସହିତ ଛାତ୍ରମାନଙ୍କୁ ଏହି ନୂତନ ପରୀକ୍ଷାର
ସାମ୍ନା କରିବାକୁ ପଡିବ । ମକ୍ ଟେଷ୍ଟ ପାଇଁ ଟଙ୍କା ଆଦାୟ କରିବା ସମ୍ପୂର୍ଣ୍ଣ ଅନ୍ୟାୟ ଅଟେ । ଏହା ବ୍ୟତୀତ, ଏହି ପରୀକ୍ଷା ପାଇଁ ପରୀକ୍ଷାକେନ୍ଦ୍ର ସଂଖ୍ୟା କମ୍ ଏବଂ ସମସ୍ତ ରାଜ୍ୟରେ ସମାନ ଭାବରେ ବଣ୍ଟନ କରାଯାଇ ନାହିଁ । ଅନେକ ଛାତ୍ରଛାତ୍ରୀଙ୍କୁ ଏହି ପରୀକ୍ଷା ଦେବାକୁ ଭିନ୍ନ ଭିନ୍ନ ରାଜ୍ୟକୁ ଦୀର୍ଘ ଦୂରତା ଯାତ୍ରା କରିବାକୁ ପଡିବ । ସପ୍ଲିମେଣ୍ଟାରୀ ପରୀକ୍ଷାର ସୁଯୋଗ ହଟାଇ ଦିଆଯାଇଛି ଏବଂ ଯେଉଁମାନେ ପ୍ରଥମ ପ୍ରୟାସରେ NEXT ରେ ଉତ୍ତୀର୍ଣ୍ଣ କରିବାରେ ଅସମର୍ଥ ହେବେ, ସେମାନଙ୍କୁ ଆଉ ଏକ ପରୀକ୍ଷା ଦେବାକୁ ୬ ମାସ ଅପେକ୍ଷା କରିବାକୁ ପଡିବ । ଏହା ହେଉଛି ଏକାଡେମିକ୍ କ୍ୟାରିୟରରେ ମୂଲ୍ୟବାନ ସମୟର କ୍ଷତି ଏବଂ ପ୍ରତ୍ୟେକ ପରୀକ୍ଷା ଛାତ୍ରମାନଙ୍କ ଉପରେ ବ୍ୟାପକ ଚାପ ସୃଷ୍ଟି କରିବ।NEXT ହେଉଛି ଏକ କମ୍ପ୍ୟୁଟର ଆଧାରିତ MCQ ପରୀକ୍ଷା | ପ୍ରଶ୍ନର ଢ଼ାଞ୍ଚା ଓ ପରୀକ୍ଷାର ଆଭିମୁଖ୍ୟ ସମ୍ପୂର୍ଣ୍ଣ ଭିନ୍ନ ଏବଂ ଫଳସ୍ୱରୂପ, ଛାତ୍ରଛାତ୍ରୀମାନେ ଘରୋଇ କୋଚିଂ ଅନୁଷ୍ଠାନରୁ ଅତିରିକ୍ତ କୋଚିଂ ନେବାକୁ ବାଧ୍ୟ ହେବେ, ଯାହା ଛାତ୍ରଛାତ୍ରୀମାନଙ୍କ ଉପରେ ଏକ ବଡ଼ ଆର୍ଥିକ ବୋଝ ସୃଷ୍ଟି କରିବା ସହ କୋଚିଂ ସେଣ୍ଟରଗୁଡିକ ବହୁତ ଲାଭବାନ ହେବେ । ନୂତନ ବ୍ୟବସ୍ଥାରେ ଲାଇସେନ୍ସ ପାଇଁ ଅଭ୍ୟାସ କରିବା ପାଇଁ ଦୁଇଟି ପରୀକ୍ଷା ଆବଶ୍ୟକ, ଗୋଟିଏ ହେଉଛି NEXT 1 ଯାହାକି ଜାତୀୟ ସ୍ତରର ପ୍ରତିଯୋଗିତାମୂଳକ ପରୀକ୍ଷା ଏବଂ ଅନ୍ୟଟି ହେଉଛି NEXT 2 ଯାହାକି ଇଣ୍ଟର୍ନସିପ୍ ଶେଷ ହେବା ପରେ ବିଶ୍ୱବିଦ୍ୟାଳୟ ପରୀକ୍ଷା । ଏହି ନୂତନ ବ୍ୟବସ୍ଥା ଡାକ୍ତରୀ ଛାତ୍ରଛାତ୍ରୀମାନଙ୍କ ମାନସିକ ସ୍ୱାସ୍ଥ୍ୟକୁ ଗୁରୁତର ଭାବରେ ବିପଦରେ ପକାଇବ । ତେଣୁ ଅବିଳମ୍ବେ NEXT ( National Exit Test )କୁ ପ୍ରତ୍ୟାହାର କରିବା ପାଇଁ ଛାତ୍ରଛାତ୍ରୀମାନେ ଦୃଢ଼ ଦାବି କରିଛନ୍ତି।