ଶିମିଳିପାଳରୁ ଶିକାରୀ ଗିରଫ, ଅସ୍ତ୍ରଶସ୍ତ୍ର ଜବତ

ବାରିପଦା:ଶିମିଳିପାଳ ଅଭୟାରଣ୍ୟରୁ ଜଣେ ବନ୍ୟଜନ୍ତୁ ଶିକାରୀକୁ ବନ ବିଭାଗ ଗିରଫ କରିଛି। ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପର ଉତ୍ତର ବନ୍ୟଖଣ୍ଡ ଅନ୍ତର୍ଗତ ଚହଲା ବନ୍ୟପ୍ରାଣୀ ରେଞ୍ଜ ଅଞ୍ଚଳରୁ ଗିରଫ ହୋଇଥିବା ଶିକାରୀ ଜଣକ ହେଲେ ନୁନିଆଗୋଡ଼ା ଗ୍ରାମର ମଙ୍ଗଳ ବାନସିଂ(୪୩)। ତାଙ୍କ ପାଖରୁ ଶିକାର ନିମନ୍ତେ ବ୍ୟବହୃତ ଗୋଟିଏ ଧନୁ, ୩ଟି ତୀର ଓ ଅନ୍ୟାନ୍ୟ ସାମଗ୍ରୀ ଜବତ କରାଯାଇଛି। ଶିମିଳିପାଳ ଅଭୟାରଣ୍ୟର ଚହଲା ରେଞ୍ଜର ପୋରାଗୋଡ଼ା ଅଞ୍ଚଳରେ ବନ କର୍ମଚାରୀ ମାନଙ୍କ ଦ୍ଵାରା ଫୁଟ ପେଟ୍ରୋଲିଂ ଜାରି ଥିଲା। ଉକ୍ତ ସମୟରେ କୋର ଅଞ୍ଚଳକୁ ଅଭିଯୁକ୍ତ ଜଣଙ୍କ ପ୍ରବେଶ କରୁଥିବାର ବନ ବିଭାଗକୁ ବିଶ୍ୱସ୍ଥ ସୂତ୍ରରୁ ଖବର ମିଳିଥିଲା। ଟିମ ଚଢ଼ାଉ କରି ଉପରୋକ୍ତ ସଫଳତା ପାଇଛି । ବିଭାଗ ପକ୍ଷରୁ ପଚରା ଉଚରା କରିବା ପରେ ଶିକାରୀଙ୍କୁ କୋର୍ଟ ଚାଲାଣ କରାଯାଇଛି ବୋଲି ଶିମିଳିପାଳ ଅଭୟାରଣ୍ୟର ଉତ୍ତର ବନଖଣ୍ଡର ଉପ-ନିର୍ଦ୍ଦେଶକ ସାଇ କିରଣ ସୂଚନା ଦେଇଛନ୍ତି।