ଗାଈ ଚରାଳିଙ୍କୁ ଗୁଳି କରି ହତ୍ୟା, ଜଙ୍ଗଲରୁ ମୃତଦେହ ଉଦ୍ଧାର

ଭୁବନେଶ୍ୱର:ବ୍ରାହ୍ମଣୀଗାଁ, ୨୫/୮(ସମିସ) : ଗାଈ ଚରାଳିଙ୍କୁ ଗୁଳି କରି ହତ୍ୟା। ଦାରିଙ୍ଗବାଡ଼ି ବ୍ଲକ ବ୍ରାହ୍ମଣୀଗାଁ ଥାନା କାଟିଙ୍ଗିଆ ପଞ୍ଚାୟତ ଖାରିଗୁଡ଼ା ଗ୍ରାମର ଜଣେ ଗାଈ ଚରାଳିଙ୍କୁ କେହି ଦୁର୍ବୃତ୍ତ ଗୁଳିକରି ହତ୍ୟା କରିଥିବା ଅଭିଯୋଗ ହୋଇଛି। ଏନେଇ ବ୍ରାହ୍ମଣୀଗାଁ ଥାନାରେ ଅଭିଯୋଗ ହୋଇଛି । ମୃତ ବ୍ୟକ୍ତି ଜଣକ ହେଲେ ଖାରିଗୁଡ଼ା ଗ୍ରାମର ମାଦି ପଡ୍ରା (୫୫ ବର୍ଷ) ବୋଲି ଜଣା ପଡିଛି । ବ୍ରାହ୍ମଣୀଗାଁ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।ସୂଚନାନୁଯାୟୀ, ମୃତ ମାଦି ପଡ୍ରା ପ୍ରତିଦିନ ଭଳି ସିତାଙ୍ଗମାଜୁ ଜଙ୍ଗଲକୁ ଗାଈ ଚରାଇବା ପାଇଁ ଗୁରୁବାର ଦିନ ସକାଳୁ ବାହାରିଥିଲେ। ଅପରାହ୍ନ ୫ ଟାରେ କେବଳ ଗାଈଗୋରୁ ଗାଁକୁ ଫେରିଥିବା ବେଳେ ମାଦୀ ପଡ୍ରା ପହଞ୍ଚି ନଥିଲେ। ଏହାପରେ ତାଙ୍କ ପୁଅ ଧର୍ମେନ୍ଦ୍ର ଓ ସ୍ତ୍ରୀ ସିକମାଙ୍ଗା ଦୁହେଁ ଜଙ୍ଗଲକୁ ଖୋଜିବାକୁ ବାହାରିଥିଲେ। ଏହି ସମୟରେ ମାଦୀ ପଡ୍ରା ଗୁଳି ବିଦ୍ଧ ହୋଇ ମୃତ ଅବସ୍ଥାରେ ପଡ଼ି ରହିଥିବା ଦେଖିଥିଲେ । ମାଆ ଓ ପୁଅ ଗାଁକୁ ଆସି ସମସ୍ତଙ୍କୁ ଜଣାଇଥିବା ସହ ବ୍ରାହ୍ମଣୀଗାଁ ଥାନାରେ ଅଭିଯୋଗ କରିଥିଲେ । ପୂର୍ବ ଶତ୍ରୁତାକୁ କେନ୍ଦ୍ର କରି ପଣସପଦର ଗ୍ରାମର ଜଣେ ଯୁବକ ହତ୍ୟା କରିଥିବା ପୁଅ ଧର୍ମେନ୍ଦ୍ର ଅଭିଯୋଗ କରିଛନ୍ତି । ମାଦୀ ପଡ୍ରାଙ୍କୁ ୨ ଗୋଟି ଗୁଳି ବାଜିଥିବା ଦେଖିବାକୁ ମିଳିଛି । ଥାନା ଅଧିକାରୀ ଚାପଧାରି ପ୍ରଧାନଙ୍କ ସମେତ ପୋଲିସ ଫୋର୍ସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ଘଟଣା ସ୍ଥଳରେ ଶୋକର ଛାୟା ଖେଳି ଯାଇଛି ।