୭କିଲୋ ଗଞ୍ଜେଇ ଜବତ, ଜଣେ ଗିରଫ

ଭୁବନେଶ୍ୱର:ବେତନଟୀ/ମାଣତ୍ରୀ:ମୟୂରଭଞ୍ଜ ଜିଲ୍ଲା ଅଧୀନ ବେତନଟୀ ଅବକାରୀ ଥାନା ପକ୍ଷରୁ ଗୁରୁବାର ବଡ଼ସାହି ଥାନା ଅଧୀନ କୋଲକୋଠା ଗ୍ରାମରେ ଚଢ଼ାଉକରି ବିପୁଳ ପରିମାଣର ଗଞ୍ଜେଇ ଜବତ କରିବା ସହିତ ଏହି ବେଆଇନ କାରବାରରେ ସମ୍ପୃକ୍ତ ଗଞ୍ଜେଇ ବେପାରୀକୁ ଗିରଫକରାଯାଇଛି l ଗିରଫ ଅଭିଯୁକ୍ତ ଜଣକ ହେଉଛି ସେହି ଗ୍ରାମର ରବୀନ୍ଦ୍ର ମହାଳିକର ପୁଅ ବାପି ଓରଫ କ୍ଷୀରୋଦ l ସୂଚନା ମୁତାବକ କ୍ଷୀରୋଦ ଗଞ୍ଜେଇ ଚୋରାଚାଲାଣ ଓ ବ୍ୟବସାୟକୁ ନେଇ ମୟୂରଭଞ୍ଜ ଜିଲ୍ଲା ଅବକାରୀ ଅଧିକ୍ଷକ ପ୍ରଶାନ୍ତ କୁମାର କହଁର ବିଶ୍ୱସ୍ତସୂତ୍ରରୁ ଖବର ପାଇବା ପରେ ବେତନଟୀ ଅବକାରୀ ଥାନାକୁ ଚଢ଼ାଉପାଇଁ ନିର୍ଦେଶ ଦେଇଥିଲେ l ବେତନଟୀ ଅବକାରୀ ଥାନା ଅଧିକାରୀ ନିରଞ୍ଜନ ସାହୁ, ଏଏସଆଇ ସୁଧାଂଶୁ ବେହେରାଙ୍କ ସମେତ ପ୍ରକାଶ ଦେବତା, ଦୀପିକା ପରିଡା, କାଶୀନାଥ ସୋରେନ ପ୍ରମୁଖ ସଦଳବେଳେ ଆଜି ଚଢ଼ାଉକରି ଅଭିଯୁକ୍ତ ନିକଟରୁ ୭କିଲୋଗ୍ରାମ ଓଜନର ଗଞ୍ଜେଇ ଜବତ କରିବା ସହିତ ଏନେଇ ଏକ ମାମଲା ରୁଜୁ କରି ଅଭିଯୁକ୍ତକୁ ଗିରଫ କରିଛନ୍ତି l ତେବେ କ୍ଷୀରୋଦ ଗଞ୍ଜେଇ କିଭଳି ଏବଂ କେଉଁଠାରୁ ଆଣୁଥିଲା ଏବଂ ସେ କେବଳ ନିଜେ ବ୍ୟବସାୟ କରୁଥିଲା ନାଁ ଆଉ କେଉଁକେଉଁ ନିଶା ବ୍ୟବସାୟୀଙ୍କୁ ଗଞ୍ଜେଇ ଚାଲାଣ କରୁଥିଲା ସେନେଇ ତଦନ୍ତ ଜାରି ରଖିଛି ଅବକାରୀ ବିଭାଗ l