୧୦୦ କୋଟିର କାମ ପାଇଁ ହେଉଥିଲା ଡିଲ୍!
କୋଟିଏ ଟଙ୍କା ସହ ଆଦିତ୍ୟ ଇନଫ୍ରା ମାଲିକଙ୍କୁ ଧରିଲା ସିବିଆଇ ୧୦୦ କୋଟିର କାମ ପାଇଁ ହେଉଥିଲା ଡିଲ୍!
ଭୁବନେଶ୍ୱର: ଶନିବାର ରାତିରେ ହୋଟେଲ ମେ’ ଫେୟାର ସାମନାରୁ ୪ ଜଣ ବ୍ୟକ୍ତିଙ୍କୁ ଉଠାଇ ନେଇଛି ସିବିଆଇ । ୨ ଜଣ ହୋଟେଲ ସାମନାରେ ପାର୍କିଂ ହୋଇଥିବା ଏକ ମର୍ସିଡିଜ୍ କାର୍ ଭିତରେ ବସିଥିବା ବେଳେ ଅନ୍ୟ ଦୁଇ ଜଣ ହୋଟେଲ ଭିତରେ ସେମାନଙ୍କୁ ଅପେକ୍ଷା କରିଥିବା କୁହାଯାଉଛି । କାର୍ ରୁ କୋଟିଏରୁ ଅଧିକ ଟଙ୍କା ଏବଂ ବିପୁଳ ସୁନା ଅଳଙ୍କାର ଠାବ ହୋଇଥିବା ଜଣାପଡ଼ିଛି । ନୟାପଲ୍ଲୀ ପୁଲିସ ସହଯୋଗରେ ସିବିଆଇର ଏହି ରେଡ୍ କୁ ନେଇ ହଟଚମଟ ସୃଷ୍ଟି ହୋଇଛି ।
ପ୍ରାଥମିକ ସୂଚନା ଅନୁଯାୟୀ, ସିବିଆଇ ହାବୁଡରେ ପଡ଼ିଥିବା ବ୍ୟକ୍ତି ହେଉଛନ୍ତି ଆଦିତ୍ୟ ଦେବ ଇନଫ୍ରା ପ୍ରାଇଭେଟ୍ ଲିମିଟେଡର ନିଦେ୍ର୍ଦଶକ ଆଦିତ୍ୟ ମହାପାତ୍ର ଏବଂ ତାଙ୍କର ସହଯୋଗୀ । ଆଜି ରାତି ପ୍ରାୟ ୯ଟା ବେଳେ ସିବିଆଇ ତାଙ୍କୁ ମେ’ ଫେୟାର ହୋଟେଲ ସାମନାରୁ କାବୁ କରିଥିଲା । ହୋଟେଲ୍ ସାମନା ପାର୍କିଂ ଜାଗାରେ ଆଦିତ୍ୟ ତାଙ୍କର ମର୍ସିଡିଜ୍ କାର୍ OD 05 BV 9999ରେ ଜଣେ ସହଯୋଗୀଙ୍କ ସହ କାହାରିକୁ ଅପେକ୍ଷା କରିଥିଲେ । ସେତିକି ବେଳେ ସିବିଆଇର ଏକ ଟିମ୍ ସେହି କାର୍ ଉପରେ ଚଢ଼ଉ କରି ଆଦିତ୍ୟ ଏବଂ ସହଯୋଗୀଙ୍କୁ ଧରିଥିଲା ବେଳେ ଅନ୍ୟ ଏକ ଟିମ୍ ହୋଟେଲ ଭିତରେ ଥିବା ଦୁଇଜଣଙ୍କୁ ବାହାରକୁ ଘୋଷାଡି ଆଣୁଥିବା ପ୍ରତ୍ୟକ୍ଷଦର୍ଶୀଙ୍କଠାରୁ ଜଣାପଡ଼ିଛି ।କାର୍ ଭିତରେ ଚର୍ଚ୍ଚ ବେଳେ ସିବିଆଇ ଅଧିକାରୀମାନେ କୋଟିଏରୁ ଅଧିକ ଟଙ୍କା ଏବଂ ଏକ ମୁଣିରୁ ବିପୁଳ ପରିମାଣର ସୁନା ଅଳଙ୍କାର ପାଇଥିବା ଜଣାପଡ଼ିଛି ।ଆଦିତ୍ୟ ଦେବ ଇନଫ୍ରା ପ୍ରାଇଭେଟ୍ ଲିମିଟେଡ ସଂସ୍ଥା ବିରୋଧରେ ବ୍ୟାପକ ଅର୍ଥ ହେରଫେର ଅଭିଯୋଗ ପୂର୍ବରୁ ସିବିଆଇ ପାଖରେ ରହିଥିବା ସୂଚନା ମିଳିଛି । ଏହି ଅଭିଯୋଗ ଆଧାରରେ ପୁଲିସ ସଂସ୍ଥାର ନିଦେ୍ର୍ଦଶକ ତଥା ମାଲିକ ଆଦିତ୍ୟ ମହାପାତ୍ରଙ୍କ ଉପରେ ନଜର ରଖିଥିଲା । ଏକ ସୂତ୍ରର ସୂଚନା ଅନୁଯାୟୀ, ରାଜ୍ୟ ସରକାରଙ୍କଠାରୁ ୧୦୦ କୋଟି ଟଙ୍କାର ଏକ କାମ ପାଇବା ପାଇଁ ସଂସ୍ଥା କଥାବାର୍ତ୍ତା କରୁଥିବା ସିବିଆଇ ଠୋସ୍ ଖବର ପାଇଥିଲା । ଆଜି ସେଥିପାଇଁ ଡିଲ୍ ହେଉଥିବା ସୂଚନା ମିଳିଲା ପରେ ମେ’ ଫେୟାର ଆଗରେ ସିବିଆଇର ଦୁଇଟି ଟିମ୍ ଛକି ରହିଥିଲେ ।
ଅନ୍ୟ ଏକ ସୂତ୍ରର ଖବର ଅନୁଯାୟୀ, ଆଦିତ୍ୟ ଦେବ ଇନଫ୍ରା ପ୍ରାଇଭେଟ୍ ଲିମିଟେଡକୁ ସରକାରୀ ଅନୁଗ୍ରହ ଦେବା ପଛରେ ଜଣେ ବରିଷ୍ଠ ତଥା ପ୍ରଭାବଶାଳୀ ଅଧିକାରୀଙ୍କର ସଂପୃକ୍ତି ରହିଛି । ୧୦୦ କୋଟି ଟଙ୍କାର କାମକୁ ସଂସ୍ଥା ହାତରେ ଟେକି ଦେବା ଯୋଜନାରେ ସଂପୃକ୍ତ ବରିଷ୍ଠ ଅଧିକାରୀଙ୍କର ମୁଖ୍ୟ ଭୂମିକା ଥିବା ଚର୍ଚ୍ଚା ହେଉଛି ।ତେବେ ଏ ସମ୍ପର୍କରେ ଠୋସ୍ ତଥ୍ୟ ମିଳିପାରିନାହିଁ । ଖୁବ୍ ଶୀଘ୍ର ସିବିଆଇ ଏହାର ଖୁଲାସା କରିବ ବୋଲି ଜଣାପଡ଼ିଛି ।
