ସରକାରୀ ଚାକିରୀ ଆବେଦନ ସର୍ବୋଚ୍ଚ ବୟସ ସୀମା ୪୩ ବର୍ଷ କୁ ବୃଦ୍ଧି ଦାବି
ରାଜ୍ୟ ମୁଖ୍ୟ ଶାସନ ସଚିବଙ୍କୁ ଭେଟି ଦାବି ଜଣାଇଲେ ଯୁବ କଂଗ୍ରେସ ନେତା ଡ.ସ୍ମୃତି ରଞ୍ଜନ ଲେଙ୍କା ।

ଭୁବନେଶ୍ୱର ତା ୧୬.୧୨. ସରକାରୀ ଚାକିରିରେ ଆବେଦନର ବୟସ ସୀମା ସ୍ଥାୟୀ ଭାବେ ୪୩ବର୍ଷକୁ ବୃଦ୍ଧି କରିବା ପାଇଁ ରାଜ୍ୟରେ ଯୁବକମାନଙ୍କର ବହୁ ଦିନର ଦାବୀ ହୋଇ ଆସୁଅଛି । ପୂର୍ବ ସରକାର ସର୍ବୋଚ୍ଚ ବୟସ ସୀମାକୁ ୩୨ବର୍ଷରୁ ୩୮ବର୍ଷକୁ ମାତ୍ର ୩ବର୍ଷ ପାଇଁ ଅସ୍ଥାୟୀ ଭାବେ ବୃଦ୍ଧି କରିଥିଲେ । କିନ୍ତୁ ନିୟମିତ ବ୍ୟବଧାନରେ ନିଯୁକ୍ତି ପ୍ରକ୍ରିୟା ତ୍ୱାରାନିତ ନହେବା କାରଣରୁ ରାଜ୍ୟର ଯୁବକମାନଙ୍କୁ ଏହାର ସୁଫଳ ସଠିକ ଭାବେ ମିଳିପାରି ନଥିଲା । ଏବେ ଏହି ସମୟ ସୀମା ଅତିକ୍ରାନ୍ତ ହେବାକୁ ଥିବା ବେଳେ ଚଳିତ ସରକାର ଏ ଦିଗରେ ନିରବଦ୍ରଷ୍ଠା ସାଜି ଥିବାରୁ ପୁନର୍ବାର ଏହି ବୟସ ସୀମା ୩୨ବର୍ଷରେ ସୀମିତ ହେବାକୁ ଯାଉଛି । ଯାହା ଫଳରେ ରାଜ୍ୟର ବହୁ ମେଧାବୀ ଛାତ୍ର ଛାତ୍ରୀଙ୍କ ଭବିଷ୍ୟତ ଅନ୍ଧକାର ଆଡକୁ ଠେଲି ହେବାକୁ ଯାଉଛି । ଆଜି ଓଡ଼ିଶା ଯୁବ କଂଗ୍ରେସର ପୂର୍ବତନ ରାଜ୍ୟ ସଭାପତି ତଥା ଅଖିଳ ଭାରତୀୟ ଯୁବ କଂଗ୍ରେସର ରାଷ୍ଟ୍ରୀୟ ସାଧାରଣ ସଂପାଦକ ଡ.ସ୍ମୃତି ରଞ୍ଜନ ଲେଙ୍କାଙ୍କ ନେତୃତ୍ୱରେ ଏକ ପ୍ରତିନିଧି ଦଳ ଓଡ଼ିଶା ସରକାରଙ୍କର ମୁଖ୍ୟ ଶାସନ ସଚୀବ ଶ୍ରୀଯୁକ୍ତ ମନୋଜ ଆହୁଜାଙ୍କୁ ରାଜ୍ୟ ଲୋକସେବା ଭବନରେ ଭେଟି ଏ ସଂକ୍ରାନ୍ତରେ ବିସ୍ତୃତ ଆଲୋଚନା କରିଥିଲେ । ସରକାରୀ ଚାକିରିରେ ଆବେଦନର ସର୍ବୋଚ୍ଚ ବୟସ ସୀମା ୪୩ ବର୍ଷକୁ ସ୍ଥାୟୀ ଭାବେ ବୃଦ୍ଧି କରିବା ପାଇଁ ପ୍ରତିନିଧି ଦଳ ଦାବୀ ପତ୍ର ପ୍ରଦାନ କରିଥିଲେ । ଦେଶର ଅନ୍ୟ ରାଜ୍ୟ ଯଥା ଗୋଆରେ ୪୫ବର୍ଷ, ତେଲେଙ୍ଗାନାରେ ୪୪ବର୍ଷ, ଉତରପ୍ରଦେଶ ଓ ରାଜସ୍ଥାନର ୪୦ ବର୍ଷ, ଆସାମରେ ୪୪ବର୍ଷ, ଆନ୍ଧ୍ରପ୍ରଦେଶରେ ୪୨ବର୍ଷ ଥିବା ସ୍ଥଳେ ଓଡ଼ିଶା ସରକାର ଏ ନେଇ କାହିଁକି ସ୍ଥାୟୀ ପଦକ୍ଷେପ ଗ୍ରହଣ କରୁନାହାଁନ୍ତି ବୋଲି ଡ. ଲେଙ୍କା ଦାବି କରିଥିଲେ । ଏବଂ ଏ ଦିଗରେ ସରକାର ତୁରନ୍ତ ପଦକ୍ଷେପ ଗ୍ରହଣ କରିବାପାଇଁ ଦାବିପତ୍ର ପ୍ରଦାନ କରାଯାଇଥିଲା ।
ଆଜିର ଏହି ପ୍ରତିନିଧି ଦଳରେ ଅନ୍ୟମାନଙ୍କ ମଧ୍ୟରେ ଜ୍ଞାନରଞ୍ଜନ ରାଉତ, ଆଦିତ୍ୟ ପ୍ରସାସ ପରିଡା, ଆଶୁତୋଷ ଲେଙ୍କା ଓ ବିକାଶ ନାୟକ ପ୍ରମୁଖ ଉପସ୍ଥିତ ଥିଲେ ।