ଆଜି ଶେଷ ପର୍ଯ୍ୟାୟରେ ୪୬୦ ପ୍ରାର୍ଥୀଙ୍କ ଭାଗ୍ୟ ପରୀକ୍ଷା

ଭୁବନେଶ୍ୱର: ଓଡ଼ିଶାରେ ଚତୁର୍ଥ ତଥା ଶେଷ ପର୍ଯ୍ୟାୟ ମତଦାନ ଆସନ୍ତାକାଲି ଅନୁଷ୍ଠିତ ହେବ । ମୟୁରଭଞ୍ଜ, ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, ଜଗତସିଂହପୁର ଲୋକସଭା ଆସନ ସମେତ ଏହା ଅଧୀନସ୍ଥ ୪୨ଟି ବିଧାନସଭା ଆସନରେ ୯୯ ଲକ୍ଷ ୬୧ ହଜାର ମତଦାତା ସେମାନଙ୍କ ମନ ପସନ୍ଦର ନେତା ବାଛିବେ । ୬୬ ଲୋକସଭା ପ୍ରାର୍ଥୀ ଏବଂ ୩୯୪ ବିଧାନସଭା ପ୍ରାର୍ଥୀ ଭାଗ୍ୟ ପରୀକ୍ଷା ଦେବେ ।
ପ୍ରମୁଖ ଲୋକସଭା ପ୍ରାର୍ଥୀଙ୍କ ମଧ୍ୟରେ ଅଛନ୍ତି ପ୍ରତାପ ଷଡ଼ଙ୍ଗୀ, ବୈଜୟନ୍ତ ପଣ୍ଡା, ସୁଦାମ ମାର୍ଣ୍ଡି, ଶ୍ରୀକାନ୍ତ ଜେନା, ଲେଖାଶ୍ରୀ ସାମନ୍ତସିଂହାର ଏବଂ ଅଂଶୁମାନ ମହାନ୍ତି । ସେହିପରି ପ୍ରମୁଖ ବିଧାନସଭା ପ୍ରାର୍ଥୀଙ୍କ ମଧ୍ୟରେ ଅଛନ୍ତି ମନ୍ତ୍ରୀ ସର୍ବଶ୍ରୀ ଅତନୁ ସବ୍ୟସାଚୀ ନାୟକ, ପ୍ରତାପ ଦେବ, ପ୍ରୀତିରଂଜନ ଘଡ଼ାଇ ଏବଂ କଂଗ୍ରେସ ନେତା ନିରଞ୍ଜନ ପଟ୍ଟନାୟକ ।
ଏହି ଶେଷ ପର୍ଯ୍ୟାୟରେ ମତଦାନ କରିବାକୁ ଥିବା ସମୁଦାୟ ୯୯.୬୧ ଲକ୍ଷ ଭୋଟରଙ୍କ ମଧ୍ୟରେ ୫୦.୮୮ ଲକ୍ଷ ପୁରୁଷ ଏବଂ ୪୮.୭୨ ଲକ୍ଷ ମହିଳା ଭୋଟର ଅଛନ୍ତି । ୬୮୭ ଜଣ ତୃତୀୟ ଲିଙ୍ଗି ଭୋଟର ମତଦାନ କରିବେ ।
ସମୁଦାୟ ୧୦, ୮୮୨ ବୁଥ୍ ରେ ୭୦ ହଜାର ପୋଲିଂ କର୍ମଚାରୀ ନିଯୁକ୍ତ ହୋଇଛନ୍ତି । ୧୬ ପ୍ରତିଶତ ବୁଥ୍ କୁ ସମ୍ବେଦନଶୀଳ ଚିହ୍ନଟ କରାଯାଇଛି । ଶାନ୍ତିଶୃଙ୍ଖଳାର ସହ ନିର୍ବାଚନ ପାଇଁ ୧୨୬ କମ୍ପାନୀ ସିଏପିଏଫ ମୁତୟନ ହେବେ । ସେଥିରୁ ୨୧ କମ୍ପାନୀ ଫୋର୍ସ ଯାଜପୁରରେ, ୨୨ କମ୍ପାନି ଫୋର୍ସ ବାଲେଶ୍ୱରରେ, ୧୬ କମ୍ପାନୀ ଫୋର୍ସ ଭଦ୍ରକରେ, କେନ୍ଦ୍ରାପଡ଼ା ଏବଂ ମୟୁରଭଞ୍ଜରେ ୧୮ କମ୍ପାନୀ ଫୋର୍ସ ମୁତୟନ ହେବେ ବୋଲି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ସୂଚନା ଦେଇଛନ୍ତି ।
ପୁଲିସ ଡିଜି ଅରୁଣ ଷଡଙ୍ଗୀ ମଧ୍ୟ ଏକ ସାମ୍ବାଦିକ ସମ୍ମିଳନୀରେ ସୁରକ୍ଷା ବ୍ୟବସ୍ଥାର ବିସ୍ତୃତ ସୂଚନା ଦେଇଛନ୍ତି ।
ସୂଚନାଥାଉକି, ୨୦୧୯ ନିର୍ବାଚନରେ ଏହି ୬ ଟି ଲୋକସଭା ଆସନ ମଧ୍ୟରୁ ୪ ଟି ଆସନରେ ବିଜେଡି ଜିତିଥିଲା । ଦୁଇଟି ଆସନ ମୟୁରଭଞ୍ଜ ଏବଂ ବାଲେଶ୍ୱର ବିଜେପି ହାତକୁ ଯାଇଥିଲା । ସେହିଭଳି ୪୨ ଟି ବିଧାନସଭା ଆସନ ମଧ୍ୟରୁ ୩୩ଟି ଆସନ ବିଜେଡି ଖାତାକୁ ଯାଇଥିଲା ବେଳେ ବିଜେପିକୁ ୯ଟି ଆସନ ମିଳିଥିଲା । କଂଗ୍ରେସ ଗୋଟିଏ ବି ଆସନ ପାଇ ନ ଥିଲା ।