ଉଚ୍ଚ ବିଦ୍ୟାଳୟ ପ୍ରଧାନଶିକ୍ଷକଙ୍କ ଦ୍ୱିତୀୟ ବ୍ଲକ୍‌ସ୍ତରୀୟ ମାସିକ ଆଲୋଚନା ବୈଠକ
 ବିଦ୍ୟାଳୟର ଶୈକ୍ଷିକ ବିକାଶ ଉପରେ ହେବ ଆଲୋଚନା
 ଆକାଂକ୍ଷୀ ପାଠ୍ୟକ୍ରମ, ମୁଖ୍ୟମନ୍ତ୍ରୀ ଶିକ୍ଷା ପୁରସ୍କାର ଉପରେ ରହିବ ଗୁରୁତ୍ୱ
 ଯୋଗ ଦେବେ ବିଭାଗୀୟ ଉଚ୍ଚପଦସ୍ଥ ଅଧିକାରୀ
ଭୁବନେଶ୍ୱର,୯୦/୧୧: ଉଚ୍ଚ ବିଦ୍ୟାଳୟରେ ଛାତ୍ରଛାତ୍ରୀଙ୍କ ସାମଗ୍ରିକ ବିକାଶ ପାଇଁ ଶୁକ୍ରବାର ଉଚ୍ଚ ବିଦ୍ୟାଳୟର ପ୍ରଧାନଶିକ୍ଷକଙ୍କ ଦ୍ଵିତୀୟ ବ୍ଲକସ୍ତରୀୟ ମାସିକ ଆଲୋଚନା ବୈଠକ ରାଜ୍ୟର ସମସ୍ତ ବ୍ଲକରେ ଆୟୋଜିତ ହେବ । ବ୍ଲକସ୍ତରରେ ସମସ୍ତ ଉଚ୍ଚ ବିଦ୍ୟାଳୟର ପ୍ରଧାନଶିକ୍ଷକ/ଶିକ୍ଷୟିତୀମାନେ ଏହି ବୈଠକରେ ଯୋଗ ଦେବେ । ଶିକ୍ଷାର୍ଥୀଙ୍କ ଶୈକ୍ଷିକ ବିକାଶଠୁ ନେଇ ବିଦ୍ୟାଳୟ ଭିତ୍ତିଭୂମିର ଉତ୍ତମ ପରିଚାଳନା ସମ୍ପର୍କରେ ଆଲୋଚନ କରାଯିବ। ବ୍ଲକ୍ ଶିକ୍ଷା ଅଧିକାରୀ (ବିଇଓ)ଙ୍କ ଅଧ୍ୟକ୍ଷତାରେ ବୈଠକର ଆୟୋଜନ କରାଯିବ ।
ଦ୍ୱିତୀୟ ମାସିକ ବୈଠକରେ ଆଲୋଚନାରେ ହାଉସ୍ ସିଷ୍ଟମ୍, କ୍ଲବ୍, ମୁଖ୍ୟମନ୍ତ୍ରୀ ଶିକ୍ଷା ପୁରସ୍କାର, ଅଧାରୁ ପାଠ ଛାଡିଥିବା ଛାତ୍ରଛାତ୍ରୀଙ୍କ ରାଜ୍ୟ ମୁକ୍ତ ବିଦ୍ୟାଳୟ ପ୍ରତିଷ୍ଠାନ (ଏସ୍ଆଇଓଏସ୍)ରେ ନାମଲେଖା ମୁଖ୍ୟ ବିଷୟବସ୍ତୁ ରହିବ । ବିଦ୍ୟାଳୟରେ କିପରି ଭାବରେ ହାଉସ୍ ସିଷ୍ଟମ୍ କରାଯାଇ ଛାତ୍ରଛାତ୍ରୀମାନେ ସହପାଠ୍ୟକ୍ରମ କାର୍ଯ୍ୟକ୍ରମ କରିବେ ସେଉପରେ ଆଲୋଚନା କରାଯିବ । କ୍ଲବ୍ ଉପରେ ମଧ୍ୟ ବିସ୍ତୃତ ଭାବରେ ଆଲୋଚନା କରାଯିବ । ଏହା ସହ ମୁଖ୍ୟମନ୍ତ୍ରୀ ଶିକ୍ଷା ପୁରସ୍କାରରେ ବିଭିନ୍ନ ବିଭାଗରେ ପୁରସ୍କାର ପାଇଁ ଆବେଦନ ପ୍ରକ୍ରିୟା ଆରମ୍ଭ ହୋଇଥିବାବେଳେ ମାଧ୍ୟମିକ ବିଦ୍ୟାଳୟ ପୁରସ୍କାର, ପ୍ରଧାନଶିକ୍ଷକ (ମାଧ୍ୟମିକ ବିଦ୍ୟାଳୟ) ଓ ଶିକ୍ଷକ ପୁରସ୍କାର (ମାଧ୍ୟମିକ ବିଦ୍ୟାଳୟ), ପୁରାତନ ଛାତ୍ରଛାତ୍ରୀ କମିଟି ପୁରସ୍କାର ଓ ବିଦ୍ୟାଳୟ ପରିଚାଳନା କମିଟି ପୁରସ୍କାର ଉପରେ ଆଲୋଚନା କରାଯିବ । ଏହିସବୁ ପୁରସ୍କାର ପାଇଁ ପ୍ରଧାନଶିକ୍ଷକଙ୍କ କି କି ଭୂମିକା ରହିବ ସେଉପରେ ବିଇଓ ସେମାନଙ୍କୁ ଦିଗଦର୍ଶନ ଦେବେ । ଆଲୋଚନା ପରେ ବିଦ୍ୟାଳୟର ଶୈକ୍ଷିକ ବିକାଶ କିଭଳି କରାଯିବ, ଦଶମ ବୋର୍ଡ ପରୀକ୍ଷାରେ ଉତ୍ତମ ପ୍ରଦର୍ଶନ ପାଇଁ କଣ କଣ ଯୋଜନା ରହିବ ସେସମ୍ପର୍କରେ ପ୍ରଧାନଶିକ୍ଷକମାନେ ନିଜର ମତାମତ ରଖିବେ । ଏହା ସହ ଅଧାରୁ ପାଠ ଛାଡିଥିବା ଛାତ୍ରଛାତ୍ରୀଙ୍କୁ ଶିକ୍ଷାର ମୁଖ୍ୟସ୍ରୋତରେ ସାମିଲ କରିବା ପାଇଁ ପ୍ରଧାନଶିକ୍ଷକ, ଶିକ୍ଷକ, ଶିକ୍ଷୟିତ୍ରୀଙ୍କ କଣ ଦାୟିତ୍ୱ ଓ ଭୂମିକା ରହିବ ସେଉପରେ ଗୁରୁତ୍ୱାରୋପ କରାଯିବ । ଶେଷରେ ଏହି ବୈଠକ ଆୟୋଜିତ ହୋଇଥିବା ବିଦ୍ୟାଳୟ ପରିସରକୁ ସମସ୍ତ ପ୍ରଧାନ ଶିକ୍ଷକ/ଶିକ୍ଷୟିତ୍ରୀଙ୍କ ସହ ଅଧିକାରୀମାନେ ପରିଦର୍ଶନ କରିବେ । ଏହାପରେ ମିଳିତ ଭାବରେ ଉକ୍ତ ବିଦ୍ୟାଳୟର ବିକାଶ ପାଇଁ ଆବଶ୍ୟକୀୟ ଯୋଜନା ପ୍ରସ୍ତୁତ କରିବେ ।
ଉଲ୍ଲେଖଯୋଗ୍ୟ, ଏହା ପୂର୍ବରୁ ଗତ ଅକ୍ଟୋବର 10 ତାରିଖରେ ଉଚ୍ଚ ବିଦ୍ୟାଳୟର ପ୍ରଧାନଶିକ୍ଷକଙ୍କ ପ୍ରଥମ ବ୍ଲକସ୍ତରୀୟ ମାସିକ ଆଲୋଚନା ବୈଠକ ରାଜ୍ୟର ସମସ୍ତ ବ୍ଲକସ୍ତରରେ ଆୟୋଜିତ ହୋଇଥିଲା । ବ୍ଲକର ଏକ ଉଚ୍ଚ ବିଦ୍ୟାଳୟରେ ଆୟୋଜିତ ଏହି ବୈଠକରେ ସେହି ବ୍ଲକର ଅନ୍ୟ ସମସ୍ତ ଉଚ୍ଚ ବିଦ୍ୟାଳୟର ପ୍ରଧାନଶିକ୍ଷକମାନେ ଯୋଗ ଦେଇଥିଲେ । ରୂପାନ୍ତରିତ ବିଦ୍ୟାଳୟର ରକ୍ଷଣାବେକ୍ଷଣ, କ୍ଲବ୍, ହାଉସ୍ ସିଷ୍ଟମ୍, ସାଇକେଲ୍ ବଣ୍ଟନ, ମୁଖ୍ୟମନ୍ତ୍ରୀ ଶିକ୍ଷା ପୁରସ୍କାର, ଛାତ୍ରଛାତ୍ରୀଙ୍କ ଶୈକ୍ଷିକ ବିକାଶ ଦିଗରେ ଆଲୋଚନା ହୋଇଥିଲା । ରାଜ୍ୟସ୍ତରରେ ବିଭାଗୀୟ ଉଚ୍ଚ ପଦସ୍ଥ ଅଧିକାରୀମାନେ ବିଭିନ୍ନ ବ୍ଲକକୁ ଯାଇ ଏହି ବୈଠକରେ ଯୋଗ ଦେଇ ପ୍ରଧାନଶିକ୍ଷକଙ୍କୁ ବିଦ୍ୟାଳୟର ଉନ୍ନତି ଦିଗରେ ଦିଗଦର୍ଶନ ଦେଇଥିଲେ ।