୩୫ ଖଣ୍ଡ ଶିଶୁ ପଟା ଜବତ, ୨ଜଣ ଗିରଫ

ବାଲିମେଳା :ମାଲକାନଗିରି ଜିଲ୍ଲା ଓର୍କେଲ ପୋଲିସ ଚୋରା କାଠ ପଟା ଚାଲାଣ ବେଳେ କାଠ ପଟା, ପିକଅପ ଗାଡି ସହ ୨ ଜଣ ଙ୍କୁ ଗିରଫ କରି କୋର୍ଟ ଚାଲାଣ କରିଛି। ମିଳିଥିବା ସୂଚନା ଅନୁଯାୟୀ ଆଜି ସକାଳେ ବାଲିମେଳା-ଜୟପୁର ମୁଖ୍ୟ ରାସ୍ତାର ଚିତ୍ରକୋଣ୍ଡା ଛକ ନିକଟରେ ଓର୍କେଲ ପୋଲିସ ପକ୍ଷରୁ ଗାଡି ମୋଟର ଯାଞ୍ଚ ହେଉଥିବା ସମୟରେ କୁଡୁମୁଳୁଗୁମ୍ମା ପଟୁ ଏକ ପିକଅପ ଗାଡି ଆସୁଥିବା ସମୟରେ ପୋଲିସ ହାବୁଡ଼ରେ ପଡିଥିଲା। ଯାଞ୍ଚ କରିବା ସମୟରେ ସେଥିରେ କାଠ ପଟା ଥିବା ଦେଖିବାକୁ ମିଳିଥିଲା। ଉକ୍ତ ଶିଶୁ କାଠ ପଟା ଦେଖି ପୋଲିସ କାଗଜପତ୍ର ମାଗିବାରୁ ଡ୍ରାଇଭର ଦେଖାଇପାରିନଥିଲେ। ସଙ୍ଗେ ସଙ୍ଗେ ପୋଲିସ କାଠ ପଟା ଏବଂ ଗାଡି ଜବତ କରିବା ସହ ଚୋରା ଚାଲାଣ କରୁଥିବା ୨ ଅଭିଯୁକ୍ତ ମାନଙ୍କୁ ଗିରଫ କରି ଥାନାକୁ ଆଣିଥିଲେ। ଅଭିଯୁକ୍ତ ୨ ଜଣ ହେଲେ ଆନ୍ଧ୍ରପ୍ରଦେଶ ସିଲେରୁ ଅଞ୍ଚଳର ଭାସ୍କର ରାଓ କୋରା(୪୨) ଏବଂ ମହାଦେବ ଗୋଲରୀ(୩୫)।ଗାଡ଼ିରେ ଥିବା ୩୫ ଖଣ୍ଡ ଶିଶୁ କାଠ ପଟା ଜବତ ହୋଇଛି। କୁଡୁମୁଳୁଗୁମ୍ମା ଅଂଚଳରୁ ଆନ୍ଧ୍ରପ୍ରଦେଶର ସିଲେରୁ କୁ ପଟା ଚୋରା ଚାଲାଣ ହେଉଥିବା ପ୍ରାଥମିକ ତଦନ୍ତ ରୁ ଜଣାପଡିଛି।ଜବତ ଶିଶୁ କାଠର ଅନୁମାନିକ ମୂଲ୍ୟ ୧ ଲକ୍ଷ ୫୦ ହଜାର ହେବ ବୋଲି ପୋଲିସ ସୂଚନା ଦେଇଛି।ଆଜି ୨ ଅଭିଯୁକ୍ତ ଙ୍କୁ କୋର୍ଟ ଚାଲାଣ କରାଯାଇଥିବା ଓର୍କେଲ ଥାନାଧିକାରୀ ଧୀରେନ ପଟ୍ଟନାୟକ ସୂଚନା ଦେଇଛନ୍ତି।