ଚୋରି କଲେ ରାୟଗଡ଼ା ଜିଲ୍ଲାରେ…
ଆଉ ଧରା ପଡିଲେ କନ୍ଧମାଳ ଜିଲ୍ଲାରେ…

ଭୁବନେଶ୍ୱର:ଏକ ବୋଲେରୋ ଗାଡି ଚୋରି ଉଦ୍ୟମକୁ ପଣ୍ଡ କରିଛି ବାଲିଗୁଡା ପୋଲିସ ! ରାୟଗଡ଼ା ଜିଲ୍ଲା ମୁନିଗୁଡା ବ୍ଲକ ଅନ୍ତର୍ଗତ ତେଲେଙ୍ଗାପଦର ଗାଁର ଲଷ୍ମୀନାରାୟଣ ପାତ୍ରଙ୍କ ଘର ନିକଟରେ ଥିବା ଏକ ବୋଲେରୋ ଗାଡିକୁ ବିଳମ୍ବିତ ରାତିରେ ୩ ଯୁବକ ଚୋରି କରି ବାଲିଗୁଡା ଅଭିମୁଖେ ନେଇ ପଳେଇ ଯାଉଥିଲେ ! ସିସିଟିଭି କ୍ୟାମେରାରେ ଗାଡି ଚୋରି ହେବା ଜାଣି ଗାଡି ମାଲିକ ବାଲିଗୁଡାରେ ଥିବା ନିଜ ସମ୍ପର୍କୀୟଙ୍କୁ ଜଣାଇଥିଲେ ! ଏହି ଖବର ବାଲିଗୁଡା ପୋଲିସ ଜାଣିବା ପରେ ଥାନା ସମ୍ମୁଖରେ ନାକା ଲଗାଇ ଚୋରି ଗାଡିକୁ ଧରିବା ପାଇଁ ପ୍ରସ୍ତୁତ ରହିଥିଲା ! ପୋଲିସର ନାକା ଦେଖି ୩ ଅଭିଯୁକ୍ତ ଗାଡିଟିକୁ ବୁଲାଇ ପଣସପଡି ବାଇ ପାସ ରୋଡ଼ରେ ପଳେଇ ଯିବାକୁ ଉଦ୍ୟମ କରୁଥିବା ବେଳେ ବୋଲେରୋ ଗାଡିଟି ଏକ ଖାଲ ଭିତରେ ଫସି ଯାଇଥିଲା ! ଏହି ସମୟରେ ସେମାନଙ୍କୁ ପିଛା କରୁଥିବା ବାଲିଗୁଡା ପୋଲିସକୁ ଦେଖି ଘଟଣା ସ୍ଥଳରୁ ସମସ୍ତ ଅଭିଯୁକ୍ତ ଚମ୍ପଟ ମାରୁଥିବା ବେଳେ ଜଣେ ଅଭିଯୁକ୍ତ ପୋଲିସ ପଞ୍ଝାରେ ପଡିଥିଲା ! ଆଉ ଦୁଇ ଅଭିଯୁକ୍ତ ଫେରାର ହୋଇଯାଇଥିବା ବେଳେ ସେମାନଙ୍କୁ ଧରିବା ଲାଗି ପୋଲିସ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି ! ଧରା ପଡିଥିବା ଅଭିଯୁକ୍ତ ଜଣକ ବରଗଡ ଜିଲ୍ଲାର ସନ୍ତୋଷ ହିଆଲ ବୋଲି ଜଣା ପଡ଼ିଛି ! ବରଗଡ ଜିଲ୍ଲାର ଯୁବକ ମାନେ ରାୟଗଡ଼ା ଜିଲ୍ଲାରେ ଚୋରି କରି କନ୍ଧମାଳ ଜିଲ୍ଲାରେ ଧରା ପଡିବା ଘଟଣା ଏବେ ସମସ୍ତଙ୍କୁ ଆଶ୍ଚର୍ଯ୍ୟ କରିଛି।