ବିଜୁଳି ବେଗରେ ବିଜେପି ବିଜୟ ଆଡକୁ ଗତିକରୁଛି : ପିତାମ୍ବର ଆଚାର୍ଯ୍ୟ

ଭୁବନେଶ୍ୱର, ତା.୧୯/୦୫: ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ପ୍ରତିନିଧିତ୍ୱ କରୁଥିବା ଗଞ୍ଜାମ ଜିଲ୍ଲା ବର୍ତମାନ ଅପରାଧୀଙ୍କ ଚରାଭୂମି । ହିଂସା ଓ କ୍ଷୁଧାର ଠିକଣା ଯଦି ମାଗିବେ ତାହାଲେ ତାହା ହେଉଛି ମୁଖ୍ୟମନ୍ତ୍ରୀ ପ୍ରତିନିଧିତ୍ୱ କରୁଥିବା ଗଞ୍ଜାମ ଜିଲ୍ଲାର ହିଞ୍ଜିଳି ନିର୍ବାଚନ ମଣ୍ଡଳୀ । ଗତକାଲି ଗଞ୍ଜାମ ଜିଲ୍ଲା ଆସ୍କା ଲୋକସଭା ଏବଂ ୩ଟି ବିଧାନସଭା କ୍ଷେତ୍ରକୁ ଆମେ ନିର୍ବାଚନ ପ୍ରଚାର କାର୍ଯ୍ୟରେ ଯାଇଥିଲୁ ସେଠାରେ ଅଂଚଳବାସୀଙ୍କ ଉତ୍ସାହ, ଭାବପ୍ରବଣତା ଏବଂ ପ୍ରିୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଜୀଙ୍କୁ ଭଲପାଇବା ଏତେ ସ୍ପଷ୍ଟ ବାରିହୋଇପଡୁଥିଲା ଯେ, ବିଜେପି ବିଜୁଳି ଭଳି ବିଜୟ ଆଡକୁ ଗତିକରୁଛି । ବିଜେଡି ଆୟୁଷ ଆଉ ବେଶିଦିନ ନୁହେଁ ସ୍ପଷ୍ଟ ଜଣାପଡୁଛି ବୋଲି ରାଜ୍ୟ ମୁଖପାତ୍ର ତଥା ବରିଷ୍ଠ ଆଇନଜୀବୀ ଶ୍ରୀ ପିତାମ୍ବର ଆଚାର୍ଯ୍ୟ ପ୍ରକାଶ କରିଛନ୍ତି ।
ରାଜ୍ୟ କାର୍ଯ୍ୟାଳୟରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଶ୍ରୀ ଆଚାର୍ଯ୍ୟ କହିଛନ୍ତି ଯେ, ଖଲ୍ଲିକୋଟର ଜଣେ ପୁରୁଖା ବିଜେପି କର୍ମୀ ଦିଲିପ ପାହାନାଙ୍କୁ ନୃଶଂସଭାବେ ବିଜେଡିର ଗୁଣ୍ଡାମାନେ ହତ୍ୟା କଲେ । ଏ ହତ୍ୟାକାଣ୍ଡର ଷଡଯନ୍ତ୍ର ରଚିଥିଲେ ଖଲ୍ଲିକୋଟର ପୂର୍ବତନ ବିଧାୟିକା ତଥା ଦିବଂଗତ ରାଣୀ ସୁଜ୍ଞାନୀ କୁମାରୀ ଦେଓଙ୍କ ପୁତୁରା ଏବଂ ବିଜେଡି ନେତା ଦୈତାରୀ ବେହେରା । ଏ ଦୁଇଜଣ ପୋଲିସର ନାକ ତଳେ ବୁଲୁଥିଲେ ହେଁ ଏପର୍ଯ୍ୟନ୍ତ ପୋଲିସ ତାଙ୍କୁ ଗିରଫ କରିପାରିଲାନାହିଁ । ନିର୍ବାଚନକୁ ପ୍ରଭାବିତ କରିବା ପାଇଁ ରାଣୀଙ୍କ ଉଆସରେ ପୋଲିସ ଜାଣତରେ ପୁଳା ପୁଳା ଟଙ୍କା ବଂଟା ଚାଲିଛି । ଖଲ୍ଲିକୋଟର ଯେଉଁ ସ୍ୱାଭିମାନୀ ଭୋଟରମାନେ ଲାଂଚ ଟଙ୍କା ନେଉନାହାଁନ୍ତି କିମ୍ବା ବିଜେପି ସପକ୍ଷରେ କହୁଛନ୍ତି ସେମାନଙ୍କୁ କିଭଳି ହତ୍ୟା କରାଯିବ ସେନେଇ ଉଆସରେ ଷଡଯନ୍ତ୍ର ରଚାଯାଉଛି । ପୂର୍ବରୁ ଗଞ୍ଜାମ ଜିଲ୍ଲାରେ ଏକ ମୁକ୍ତ ଓ ଅବାଧ ନିର୍ବାଚନ ପାଇଁ ଆମେ କେତେଜଣ ଉଚ୍ଚପଦସ୍ତ ପୋଲିସ ଅଧିକାରୀଙ୍କ ବିରୋଧରେ ନିର୍ବାଚନ କମିଶନଙ୍କ ପାଖରେ ଗୁହାରି କରିଥିଲୁ । ଅତୀତରେ ଏମାନଙ୍କ ବିରୋଧରେ ନିର୍ବାଚନ କମିଶନଙ୍କ କଠୋର କାର୍ଯ୍ୟାନୁଷ୍ଠାନ ସତ୍ୱେ ଏମାନେ ଏବେ ବି ବିଜେଡିର ଏଜେଂଟ ଭାବେ ଲୋକମାନଙ୍କୁ ନାଲି ଆଖି ଦେଖାଇ ବିଜେଡି ସପକ୍ଷରେ ଭୋଟ ଦେବାକୁ ବାଧ୍ୟ କରୁଛନ୍ତି । ରିଭଲବଲ୍ ଦେଖାଇ ଏନ୍‌କାଉଂଟର କରିଦେବୁ ବୋଲି ଧମକାଉଛନ୍ତି । ବର୍ତମାନ ସେ ପୋଲିସ ବାବୁ ଜଣଙ୍କ (ଇଓଡବ୍ଲ୍ୟୁ) ଅଫିସରେ ବସି ବିଜେଡି ଦଳର ଅସନ୍ତୁଷ୍ଟ ନେତା ଓ ଜନସାଧାରଣଙ୍କୁ ଖୋଲାଖୋଲି ଧମକ ଦେଉଛନ୍ତି ଯେ ନିର୍ବାଚନ ପରେ ତମ କଥା ବୁଝିନେବୁ ।
ଆମେ ସେ ଆଇଜି ଆଶିଷ ସିଂ ମହୋଦୟଙ୍କୁ ଚେତାବନୀ ଦେବାକୁ ଚାହୁଁଛୁ ଯେ ଜୁନ୍ ୪ ତାରିଖରେ ବିଜେଡି ସରକାରର ନିଶ୍ଚୟ ପତନ ହେବ । ଯେତିକିଦିନ ପର୍ଯ୍ୟନ୍ତ ବିଜେଡିର ଚାମଚା ଓ ଗୁଲାମଗିରି କଲେ କଲେ ଏବେ ଯଦି ମୁକ୍ତ, ଅବାଧ ନିର୍ବାଚନ ପାଇଁ ଓଡିଶା ତଥା ଗଞ୍ଜାମ ଜିଲ୍ଲାରେ ଆପଣ ବାଧକ ସାଜନ୍ତି ତାହାର କୁପରିଣାମ ଜୁନ୍ ୧୦ତାରିଖ ଦିନ ଭୋଗ କରିବାକୁ ପଡିବ । ଏକ ନିର୍ଦ୍ଦିଷ୍ଟ ସ୍ଥାନରେ ରାତି ଅଧିଆ ଓଡ଼ିଶାର କେତେଜଣ ଉଚ୍ଚପଦସ୍ତ ପୋଲିସ ଅଧିକାରୀ ଗୁମାସ୍ତା ବାବୁଙ୍କ ସହ ଗୁପ୍ତ ମନ୍ତ୍ରଣା କରୁଛନ୍ତି । ଏସବୁର ଟିକିନିଖି ଖବର ଆମ ପାଖରେ ଅଛି ସମୟ ଆସିଲେ ସବୁକିଛିର ଜବାବ୍ ଦିଆଯିବ । ଗଞ୍ଜାମ ଜିଲ୍ଲାର ଆସ୍କା, ପୋଲସରା, ଭଞ୍ଜନଗର, କବିସୂର୍ଯ୍ୟନଗର ହେଉ କିମ୍ବା ଖଲ୍ଲିକୋଟ, ହିଞ୍ଜିଳି ହେଉ ଯେଉଁଠି ଦେଖିବେ ଖାଲି ହିଂସା ଆଉ ହିଂସା । ଅପରାଧ, ହିଂସା, କ୍ଷୁଧା ଓ ଦାଦନ ଖଟିଖିଆର ନୂଆ ଠିକଣା ଖୋଜିବାର ଅଛି ତାହା ହେଉଛି ମୁଖ୍ୟମନ୍ତ୍ରୀଙ୍କ ଗଞ୍ଜାମ ଜିଲ୍ଲା । ହିଞ୍ଜିଳିର ଦୀର୍ଘ ୨୫ବର୍ଷ ଧରି ପ୍ରତିନିଧିତ୍ୱ କରିଆସୁଥିବା ହିଞ୍ଜିଳି ନିର୍ବାଚନ ମଣ୍ଡଳୀର ଦୁଃଖ, ଦୁର୍ଦ୍ଦଶା ଓ ଦୟନୀୟତା ଭାଷାରେ ବର୍ଣ୍ଣନା କରିବା ସମ୍ଭବ ନୁହେଁ । ହିଞ୍ଜିଳି ଲୋକେ ଦୁଃଖ ଦୁର୍ଦ୍ଦଶାରେ ସମୟ କାଟୁଛନ୍ତି । ଅଧିକାଂଶ ଘରର କବାଟରେ ତାଲା ଛୁଲୁଛି ଏବଂ ପୁରୁଷମାନେ ଗୁଜୁରାଟରେ ଯାଇ ଦାଦନ ଖଟୁଛନ୍ତି । ଏପଟେ ମୁଖ୍ୟମନ୍ତ୍ରୀ କାଗଜ କଲମରେ ବିକାଶର ମିଛ ଛବି ପ୍ରଚାର ଜରିଆରେ ଦେଖାଇଚାଲିଛନ୍ତି । ହିଞ୍ଜିଳିର ସନସ୍ତ ନିର୍ବାଚନ ବୁଥ୍ ସ୍ପର୍ଶକାତରେ ବିଜେଡିର ଗୁଣ୍ଡାମାନେ ଭୋଟରମାନଙ୍କୁ ଅତ୍ୟନ୍ତ ଭୟଭୀତ ଅବସ୍ଥାରେ ରଖିଛନ୍ତି । ମୁକ୍ତ ଓ ଅବାଧ ନିର୍ବାଚନ ଏଠି ଏକ ପ୍ରହେଳିକା । ହିଞ୍ଜିଳିର ସମସ୍ତ ୨୨୫ଟି ବୁଥ୍ ଅତ୍ୟନ୍ତ ସ୍ପର୍ଶକାତର ଏବଂ ରାଜ୍ୟ ନିର୍ବାଚନ ଅଧିକାରୀ ଏଠାକାର ସମସ୍ତ ବୁଥ୍‌ରେ କେନ୍ଦ୍ରୀୟ ଫୋର୍ସ ମୁତୟନ କରନ୍ତୁ ଏବଂ ପ୍ରତ୍ୟେକ ବୁଥ୍‌କୁ ୱେବ୍‌କାଷ୍ଟିଙ୍ଗ୍ କରାଯାଉ । ବିଜେଡି ଜାଣିସାରିଲାଣି ଆସ୍କା ଲୋକସଭା ସମେତ ୭ଟି ଯାକ ବିଧାନସଭା ନିର୍ବାଚନ ମଣ୍ଡଳୀରେ ଶ୍ୱଚନୀୟ ଭାବରେ ପରାଜୟ ବରଣ କରିବ । ଓଡିଶାର ସଚେତନଶୀଳ ଭୋଟରମାନେ ଯେଉଁଭଳି ଭାବେ ୧୯୭୧ ମସିହାରେ ସ୍ୱର୍ଗୀୟ ବିଜୁ ପଟ୍ଟନାୟକଙ୍କୁ ଏକକାଳୀନ ୫ଟି ନିର୍ବାଚନ ମଣ୍ଡଳୀରେ ପରାଜୟର ସ୍ୱାଦ ଚଖାଇଥିଲେ ଏଥର ଇତିହାସର ପୁନରାବୃତି ହେବ ଏବଂ ନବୀନ ବାବୁ ସେହିଭଳି ଭାବେ ଦୁଇଟି ଯାକ ନିର୍ବାଚନ ମଣ୍ଡଳୀ ହିଞ୍ଜିଳି ଓ କଂଟାବାଂଜିରୁ ଶ୍ୱଚନୀୟ ଭାବେ ପରାଜୟ ବରଣ କରିବେ ବୋଲି ଶ୍ରୀ ଆଚାର୍ଯ୍ୟ କହିଛନ୍ତି ।
ଏହି ସାମ୍ବାଦିକ ସମ୍ମିଳନୀରେ ପୂର୍ବତନ ରାଜ୍ୟ ସଭାପତି ସମୀର ମହାନ୍ତ, ରାଜ୍ୟ ଉପସଭାପତି ଶ୍ରୀ ଗୋଲକ ମହାପାତ୍ର, ରାଜ୍ୟ ମୁଖ୍ୟ ମୁଖପାତ୍ର ସଜ୍ଜନ ଶର୍ମା ପ୍ରମୁଖ ଉପସ୍ଥିତ ଥିଲେ ।