ଭୁବନେଶ୍ୱର: ଓଲିଉଡ୍ ଜଗତର ବରିଷ୍ଠ ସିନେ ପ୍ରଯୋଜକ ଟୁଟୁ ନାୟକ ପୁଣି ଏକ ବିବାଦରେ ଚର୍ଚ୍ଚାକୁ ଆସିଛନ୍ତି । ତାଙ୍କ ବିରୋଧରେ ଆଜି ଆସିଛି ଏକ ସଙ୍ଗୀନ ଅଭିଯୋଗ । ଭୁବନେଶ୍ୱରରେ ଜଣେ କାର୍ଯ୍ୟରତ ମହିଳା ସାମ୍ବାଦିକଙ୍କୁ ସେ ମାଡ଼ ମାରିଥିବା ଖାରବେଳନଗର ଥାନାରେ ଅଭିଯୋଗ ହୋଇଛି ।
ମହିଳା ସାମ୍ବାଦିକଙ୍କ ଏତଲା ଭିତ୍ତିରେ ପୁଲିସ ସିସିଟିଭି ଯାଞ୍ଚ କରିବା ପରେ ଟୁଟୁ ନାୟକଙ୍କ ବିରୋଧରେ ଆଇପିସି ଦଫା ୩୫୪(ମହିଳାଙ୍କୁ ଅସଦାଚରଣ), ୨୯୪(ଅସଭ୍ୟ ଭାଷାରେ ଗାଳିଗୁଲଜ), ୩୪୧( କାର୍ଯ୍ୟରେ ବାଧା ଦେଇ ଅଟକାଇବା) ଏବଂ ୩୨୩(ଆଘାତ ଦେବା)ରେ ମାମଲା ରୁଜୁ କରିଛି ।
ଅଭିଯୋଗକାରିଣୀ ମହିଳା ସାମ୍ବାଦିକ ହେଉଛନ୍ତି ଇଟିଭି ଭାରତର ଦେବସ୍ମିତା ରାଉତ । ଶ୍ରୀୟା ଟକିଜ୍ କମ୍ପ୍ଲେକ୍ସରେ ଆଜି ଏକ ଓଡ଼ିଆ ଫିଲ୍ମର ପ୍ରିମିୟର୍ ସୋ’ କଭରେଜ୍ ନିମନ୍ତେ ଅନ୍ୟ ସାମ୍ବାଦିକମାନଙ୍କ ସହ ସେ ବାହାରେ ଉପସ୍ଥିତ ଥିଲେ । ସେତେବେଳେ ଅତିଥିମାନେ ଭିତରକୁ ପ୍ରବେଶ କରୁଥିଲେ । ସମୟ ହୋଇଥିଲା ଦିନ ୧୨.୫୦ ମିନିଟ୍ ।
ଦେବସ୍ମିତା ଅଭିଯୋଗ କରିଛନ୍ତି ଯେ ସେହି ସମୟରେ ପ୍ରଯୋଜକ ଟିଟୁ ନାୟକ ତାଙ୍କୁ ବିନା କାରଣରେ ଆସି ଗାଲରେ ଏକ ଚାପୁଡ଼ା ମାରିଥିଲେ । ଏଥିଯୋଗୁଁ ତାଙ୍କ ହାତରୁ ବୁମ୍ ଏବଂ ମୋବାଇଲ୍ ଖସି ତଳେ ପଡିଯାଇଥିଲା । ସେ କିଛି ବୁଝି ନ ପାରି ତରବରରେ ତଳୁ ବୁମ୍ ଓ ମୋବାଇଲ୍ ଗୋଟାଉଥିବା ବେଳେ ଟୁଟୁ ନାୟକ ପୁଣି ଥରେ ପଛରୁ ତାଙ୍କୁ ବାଡ଼େଇଥିଲେ । ଏଭଳି ଆଚରଣରେ ସେ ଭୀଷଣ ଲଜ୍ଜା ଓ ଅପମାନିତ ହୋଇଥିଲେ । ଟୁଟୁ ନାୟକ ତାଙ୍କୁ କ୍ଷମା ମାଗିବା ପରିବର୍ତ୍ତେ ଓଲଟି ସ୍ମିତହାସ୍ୟ ଦେଇ ସେଠାରୁ ଚାଲି ଯାଇଥିଲେ ।
ଖାରବେଳନଗର ଥାନାରେ ଦେବସ୍ମିତା ଏ ନେଇ ଏତଲା ଦେବା ପରେ ପୁଲିସ ସେଠାରେ ପହଞ୍ଚି ଘଟଣାର ସତ୍ୟାସତ୍ୟ ଜାଣିବା ପାଇଁ ସିସିଟିଭି ଫୁଟେଜ୍ ଯାଞ୍ଚ କରିଥିଲା । ଏହି ଘଟଣାକୁ ନେଇ ଗଣମାଧ୍ୟମରେ ତୀବ୍ର ସମାଲୋଚନା ହୋଇଥିଲା । ଶେଷର ପୁଲିସ ଟୁଟୁ ନାୟକଙ୍କ ବିରୋଧରେ ମାମଲା ରୁଜୁ କରିଛି ।
ଅନ୍ୟପକ୍ଷରେ ତାଙ୍କ ବିରୋଧରେ ମାମଲାକୁ ନେଇ ଟୁଟୁ ନାୟକ ଆଶ୍ଚର୍ଯ୍ୟ ହୋଇ ବିଭିନ୍ନ ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି । ସେ କହିଛନ୍ତି, ଦେବସ୍ମିତା ମୋ ଝିଅ ଭଳି । ଜଣେ ମହିଳା ସାମ୍ବାଦିକଙ୍କୁ ଅବା କାହିଁକି ବାଡ଼େଇବି? ଦେବସ୍ମିତାଙ୍କୁ ଯଦି ମୋର ଆଚରଣ କିଛି ଖରାପ ଲାଗିଛି ତେବେ ସେଥିପାଇଁ ଆଇ ଆମ ସରି ।