ରାଷ୍ଟ୍ର ଦମନ ଓ ପୋଲିସ୍ ଆତଙ୍କରାଜ ବିରୋଧରେ ରାଜଧାନୀ ରେ “ଢ଼ିଙ୍କିଆ ଚାରିଦେଶ ସଂହତି ଦିବସ

ଭୁବନେଶ୍ଵର, ତା ୧୮/୧/୨୪ : ଗତ ଜାନୁଆରୀ ୧୪, ୨୦୨୨ରେ ଜଗତସିଂହପୁର ଜିଲ୍ଲାର ଢ଼ିଙ୍କିଆରେ ସ୍ଥାନୀୟ ଜନସାଧାରଣ ନିଜର ଜୀବନ- ଜିବିକା ତଥା ଭିଟାମାଟି ର ସୁରକ୍ଷା ପାଇଁ ଜିନ୍ଦଲ ପ୍ରତିରୋଧ ସଂଗ୍ରାମ ସମିତି ନେତୃତ୍ୱରେ ଶାନ୍ତିପୂର୍ଣ୍ଣ ଶୋଭାଯାତ୍ରାରେ ନିଜ ନିଜର ପାନ ବରଜକୁ ଯାଉଥିବା ସମୟରେ ଓଡ଼ିଶା ପୋଲିସ୍ ଯେପରି ନିର୍ମମ ଲାଠିଚାଳନା କରିଥିଲା, ଆବାଳବୃଦ୍ଧବନିତା ତା’ର ଶୀକାର ହୋଇ ଲହୁ ଲୁହାଣ ହୋଇଥିଲେ, ତାହା ଓଡ଼ିଶାର ଗଣତାନ୍ତ୍ରିକ ଆନ୍ଦୋଳନର ଇତିହାସରେ ଏକ କଳଙ୍କମୟ ଅଧ୍ୟାୟ ବୋଲି ଆଜି ଭୁବନେଶ୍ଵରରେ ଆୟୋଜିତ ପ୍ରତିବାଦ ସଭାରେ ମତବ୍ୟକ୍ତ କରାଯାଇଛି । ଜିନ୍ଦଲ ପ୍ରତିରୋଧ ଆନ୍ଦୋଳନ କୁ ସଂହତି ଜଣାଇ “ଢ଼ିଙ୍କିଆ ଚାରିଦେଶ ସଂହତି ଦିବସ” ପାଳନ ମାଧ୍ୟମରେ କର୍ପୋରେଟ ସ୍ଵାର୍ଥରେ ବିଜେଡ଼ି ସରକାର ଯେପରି ରାଜ୍ୟର ଜମି, ଜଙ୍ଗଲ, ଖଣି ଓ ପାଣିକୁ ପୁଞ୍ଜିପତି ତଥା କର୍ପୋରେଟ ହାତରେ ଟେକି ଦେଉଛନ୍ତି ତାହା ସରକାରଙ୍କ ଜନବିରୋଧୀ ଚରିତ୍ରକୁ ପଦାରେ ପକାଇ ଦେଇଛି ବୋଲି ବିଭିନ୍ନ ନେତୃବୃନ୍ଦ ଅଭିଯୋଗ କରିଥିଲେ ।
ଅନ୍ୟ ଆନ୍ଦୋଳନକାରୀ ସାଥୀ ମାନଙ୍କ ସହିତ ୨ ବର୍ଷ ତଳେ ଗିରଫ ହୋଇ ପୋଲିସ୍ ନିର୍ଯ୍ୟାତନାର ଶିକାର ହୋଇଥିବା ଆନ୍ଦୋଳନର ନେତା ଦେବେନ୍ଦ୍ର ସ୍ୱାଇଁ ମାତ୍ର ଦୁଇ ମାସ ଅନ୍ତରୀଣ ଜାମିନ୍ ପାଇ ପୁନର୍ବାର ଜେଲରେ ଜୀବନ କାଟୁଛନ୍ତି। ଏବେ ମଧ୍ୟ ପୋଲିସ୍ ର ଆତଙ୍କରାଜ ଓ ମିଥ୍ୟା ମକଦ୍ଦମା ଜରିଆରେ ଗିରଫଦାରୀ ଚାଲୁ ରହିଛି।। ଏପରି ଏକ ସଙ୍ଗୀନ୍ ସମୟରେ ବିରୋଧୀ ରାଜନୈତିକ ଦଳ ମାନଙ୍କ ର ବିଜେଡ଼ି ସରକାରଙ୍କ ଜନବିରୋଧୀ ତଥା କର୍ପୋରେଟ ସପକ୍ଷବାଦୀ ନୀତି ବିରୋଧରେ ଯେଉଁ ଦୃଢ଼ ସ୍ୱର ଉତ୍ତୋଳନ କରିବାକୁ ସେମାନେ ଆହ୍ଵାନ ଦେଇଥିଲେ । ବିଜେଡି ସରକାର ଗୋଟିଏ ପରେ ଗୋଟିଏ ଜନବିରୋଧୀ ନୀତି ଆପଣେଇ ଚାଲିଛନ୍ତି ଓ ଉପକୂଳ ଠାରୁ ଦକ୍ଷିଣାଞ୍ଚଳ, ପଶ୍ଚିମାଞ୍ଚଳ ରୁ ଉତ୍ତରାଞ୍ଚଳ ପର୍ଯ୍ୟନ୍ତ ସବୁଆଡେ ବିସ୍ଥାପନ ନୀତି କୁ ଜୋର୍ ଦାର୍ କରିଚାଲିଛନ୍ତି । ସବୁଆଡେ କୃଷକ, ଆଦିବାସୀ, ଦଳିତ, ରାସ୍ତା ପାର୍ଶ୍ୱ ଦୋକାନୀ, ବସ୍ତି ବାସିନ୍ଦା ଏହି ବିସ୍ଥାପନ ରୂପକ କର୍ପୋରେଟ ଆକ୍ରମଣ ର ସହଜ ଶିକାର ହେଉଛନ୍ତି ବୋଲି ସେମାନେ ଦର୍ଶାଇଥିଲେ ।
ଜିନ୍ଦଲ ପ୍ରତିରୋଧ ଆନ୍ଦୋଳନ ସଂହତି ମଞ୍ଚ ପକ୍ଷରୁ ନରେନ୍ଦ୍ର ମହାନ୍ତିଙ୍କ ସଂଯୋଜନାରେ ଆୟୋଜିତ ଏହି ସଭାରେ ବିଶ୍ୱପ୍ରିୟ କାନୁନଗୋ, ହେନାରାଣୀ, ମହେନ୍ଦ୍ର ପରିଡା,ପ୍ରଶାନ୍ତ ପାଇକରାୟ, ଶଙ୍କର, ବିଶ୍ୱନାଥ ପାତ୍ର, ପ୍ରଦୀପ ସାହୁ ପ୍ରମୁଖ ଉଦବୋଧନ ଦେଇଥିଲେ । ଅନ୍ୟମାନଙ୍କ ମଧ୍ୟରେ ଏହାକୁ ସମର୍ଥନ କରି ସୁଧୀର ପଟ୍ଟନାୟକ, ଶ୍ରୀମନ୍ତ ମହାନ୍ତି, ପୂଜା, ସତୀଶ୍ ମିଶ୍ର, ଅଶୋକ ସାହୁ, ପ୍ରମୋଦିନୀ ପ୍ରଧାନ, ରାକେଶ କାନୁନଗୋ,ସସ୍ମିତା ଜେନା, ଦେବରଞ୍ଜନ, ବିଜୟ ପଣ୍ଡା , ନିଗମ, ସୁବାସ, ତପନ ପାଢୀ, ମହମ୍ମଦ ସୁକୁର୍, ଦେବୀପ୍ରସନ୍ନ ପ୍ରମୁଖ ଆଜିର କାର୍ଯ୍ୟକ୍ରମରେ ସାମିଲ ହୋଇଥିଲେ । ଜିନ୍ଦଲ କମ୍ପାନୀ ସମେତ ରାଜ୍ୟର ବିଭିନ୍ନ ସ୍ଥାନରେ ଯଥା ନିୟମଗିରି , ଖଣ୍ଡୁଆଳମାଳୀ, ସିଜିମାଳୀ ଓ କୋରାପୁଟ ମାଳି ପର୍ବତ ଅଞ୍ଚଳରେ ବେଦାନ୍ତ, ହିଣ୍ଡାଲକୋ, ମୈତ୍ରୀ ଭଳି କର୍ପୋରେଟ/କମ୍ପାନୀ ମାନଙ୍କ ସହିତ ହୋଇଥିବା ଜନବିରୋଧି ଚୁକ୍ତି ବାତିଲ କରିବା, ମିଥ୍ୟା ମକଦ୍ଦମାରେ ଗିରଫ ହୋଇଥିବା ଆନ୍ଦୋଳନକାରୀ ମାନଙ୍କୁ ମୁକ୍ତ କରିବା, ଗଣତାନ୍ତ୍ରିକ ଆନ୍ଦୋଳନ ଉପରେ ରାଷ୍ଟ୍ର ଦମନ ବନ୍ଦ କରିବା ସହିତ ଗ୍ରାମସଭାର ଅଧିକାରକୁ ସମ୍ମାନ ଦେବାକୁ ସେମାନେ ଦାବି କରିଥିଲେ।