ଗୁରୁ କେଳୁଚରଣ ମହାପାତ୍ରଙ୍କ ୯୮ତମ ଜନ୍ମ ବାର୍ଷିକରେ ଓଡ଼ିଶୀର ଅନନ୍ୟ ରୂପରେଖ “ଅର୍ନ୍ତଃଦୃଷ୍ଟି’

ଭୁବନେଶ୍ୱର (୦୮.୦୧.୨୦୨୪):* ଗୁରୁ କେଳୁଚରଣ ମହାପାତ୍ରଙ୍କ ଦ୍ୱାରା ପ୍ରତିଷ୍ଠିତ ସୃଜନ ଅନୁଷ୍ଠାନ ଓ ଗୁରୁ କେଳୁଚରଣ ମହାପାତ୍ର ଓଡ଼ିଶୀ ଗବେଷଣା କେନ୍ଦ୍ର ଦ୍ୱାରା ଆୟୋଜିତ “ଅର୍ନ୍ତଃଦୃଷ୍ଟି’ – ଭାରତୀୟ ଶାସ୍ତ୍ରୀୟ ନୃତ୍ୟ ଓ ସଙ୍ଗୀତ କାର୍ଯ୍ୟକ୍ରମ ଆଜି ରବୀନ୍ଦ୍ର ମଣ୍ଡପରେ ଉଦ୍‌ଘାଟିତ ହୋଇଯାଇଅଛି । ଓଡ଼ିଶାର ସଂସ୍କୃତି ପ୍ରେମୀ ଦର୍ଶକମାନଙ୍କୁ ଭାରତର ବିଭିନ୍ନ ଶାସ୍ତ୍ରୀୟ ନୃତ୍ୟ ଓ ସଙ୍ଗୀତକୁ ପ୍ରଦର୍ଶିତ କରାଇବା ଏହି ଉତ୍ସବର ମୂଳ ଉଦେ୍ଦଶ୍ୟ । ଗୁରୁ କେଳୁଚରଣ ମହାପାତ୍ରଙ୍କ ସ୍ମୃତିରେ ତାଙ୍କ ୯୮ତମ ଜନ୍ମ ଦିବସରେ ଶାସ୍ତ୍ରୀୟ ନୃତ୍ୟ ଓ ସଙ୍ଗୀତର ଏହି ଅଭିନବ ପ୍ରୟାସ ଅତ୍ୟନ୍ତ ସ୍ୱାଗତଯୋଗ୍ୟ ।
ସଂନ୍ଧ୍ୟାରେ ଅତିଥି ବିଶିଷ୍ଟ ଓଡ଼ିଆ ଚଳଚିତ୍ର ଅଭିନେତା ତଥା ନିର୍ଦ୍ଦେଶକ ପ୍ରଶାନ୍ତ ନନ୍ଦ, ପ୍ରଖ୍ୟାତ ଓଡ଼ିଆ ନାଟ୍ୟ ଅଭିନେତା ତଥା ନିର୍ଦ୍ଦେଶକ ଧୀର ମଲ୍ଲୀକ, ବିଶିଷ୍ଟ ଓଡ଼ିଶୀ ନୃତ୍ୟାଙ୍ଗନା ମଧୁସ୍ମିତା ମହାନ୍ତି, ସୁନାମଧନ୍ୟ ବଂଶୀବାଦକ ଶ୍ରୀନିବାସ ଶତପଥୀ, ସୃଜନର ନିର୍ଦ୍ଦେଶକ ତଥା ଅର୍ନ୍ତଃଦୃଷ୍ଟି କାର୍ଯ୍ୟକ୍ରମର ଆୟୋଜକ ରତିକାନ୍ତ ମହାପାତ୍ର ଏବଂ ଗୁରୁ କେଳୁଚରଣ ମହାପାତ୍ର ଓଡ଼ିଶୀ ଗବେଷଣା କେନ୍ଦ୍ରର କାର୍ଯ୍ୟ ନିର୍ବାହୀ ଅଧିକାରୀଙ୍କ ଦ୍ୱାରା ପ୍ରଦୀପ ପ୍ରୋଜ୍ୱଳନ ପୂର୍ବକ କାର୍ଯ୍ୟକ୍ରମ ଆରମ୍ଭ ହୋଇଥିଲା ।
ଉଦ୍‌ଘାଟନୀ ସଂଧ୍ୟାର ପ୍ରଥମ କାର୍ଯ୍ୟକ୍ରମରେ ଓଡ଼ିଶୀ ନୃତ୍ୟକୁ ମୁଳଭିତ୍ତି କରି ପ୍ରୟୋଗାତ୍ମକ ଢଙ୍ଗରେ ନୃତ୍ୟ ପ୍ରସ୍ତୁତ କରିଥିଲେ ସୃଜନ ଅନୁଷ୍ଠାନର ଶିଳ୍ପୀମାନେ । ସେମାନଙ୍କର ପ୍ରଥମ ପ୍ରସ୍ତୁତିରେ ଥିଲା ଶିବ ତାଣ୍ଡବ ସ୍ତ୍ରୋତ୍ରମ୍‌ ଯାହା ରାଗ ଭତିୟାର ଏବଂ ତାଳ ଖେମଟା ଓ ଆଦିତାଳ ଉପରେ ନିବଦ୍ଧ ଥିଲା । ସେମାନଙ୍କ ଦ୍ୱିତୀୟ ଉପସ୍ଥାପନା ଥିଲା ସଙ୍ଗୀତ ଧ୍ୱନୀର ଅବାଧ ଉତ୍ସ ଜୀବନମ୍‌ ମଧୁ ସଙ୍ଗୀତମୟମ୍‌ ଯେଉଁଥିରେ ନୃତ୍ୟଶିଳ୍ପୀମାନେ ତାହାର ମନୋମୁଗ୍ଧକର ଛନ୍ଦ ଏବଂ ସୁନ୍ଦର ବାଦ୍ୟକୁ ନେଇ ଆନନ୍ଦରେ ନୃତ୍ୟ ପରିବେଷଣ କରିଥିଲେ ଯାହା ରାଗ ରାଗମାଳିକା ଓ ଆଦିତାଳ ଉପରେ ପର୍ଯ୍ୟବେସିତ ଥିଲା । ଶେଷରେ ଦୃଢ ପ୍ରଶିକ୍ଷଣ ଏବଂ ସମନ୍ୱୟ ଆଧାରରେ ସୃଜନ ଅନୁଷ୍ଠାନର ଶିଳ୍ପୀମାନଙ୍କ ପରିବେଷଣରେ ଥିଲା କଳା ଓ ଅନ୍ୟ କ୍ଷେତ୍ରରେ ଉକ୍ରର୍ଷର ଆହ୍ୱାନ – ଆବାହନମ୍‌ ଯେଉଁଥିରେ ସୂର୍ଯ୍ୟଙ୍କ ଅପୂର୍ବ ଉଜ୍ଜ୍ୱଳ ଗତିପଥକୁ ନୃତ୍ୟ ମାଧ୍ୟମରେ ବଖାଣି ଥିଲେ ଶିଳ୍ପୀଗଣ । ନୃତ୍ୟ ପରିବେଷଣ କରିଥିବା ନୃତ୍ୟଶିଳ୍ପୀମାନେ ଥିଲେ ରାଜଶ୍ରୀ ପ୍ରହରାଜ, ଐଶର୍ଯ୍ୟା ସିଂହଦେବ, ପ୍ରୀତିଶା ମହାପାତ୍ର, ସଞ୍ଜୟ କୁମାର ବେହେରା, ଜି ସଞ୍ଜୟ, ମାଧବୀ ରାଉତ, ଆଲିଶା ଧଳ, ଡ଼ାଏନା ଘୋଷ ଏବଂ ପ୍ରାଚୀ ମହାନ୍ତି । ଗୁରୁ ରତିକାନ୍ତ ମହାପାତ୍ରଙ୍କ ନିଖୁଣ ଏବଂ ସମୟ ସାମୟିକ ସଂରଚନାରେ ସୁନ୍ଦର ଓ ଚମକ୍ରାର ପରିବେଷଣ ଅତ୍ୟନ୍ତ ଚିତ୍ତାକର୍ଷକ ଓ ଭାବୋଦ୍ଦୀପକ ଥିଲା ଯାହାକୁ ଦର୍ଶକ ବେଶ୍‌ ପସନ୍ଦ କରିଥିଲେ ।
କାର୍ଯ୍ୟକ୍ରମ ଶେଷରେ ଯୁବ ତଥା ପ୍ରତିଭାବାନ ତବଲା ବାଦକ ଇଶାନ୍‌ ଘୋଷଙ୍କ ଦ୍ୱାରା ତବଲା ବାଦନ ପରିବେଷିତ ହୋଇଥିଲା ତାଙ୍କୁ ହାରମୋନିୟମ୍‌ରେ ସହଯୋଗ କରିଥିଲେ ହିରଣ୍ମୟ ମିତ୍ର । ତାଙ୍କ ପରିବେଷଣରେ ଥିଲା ତାଙ୍କ ପିତାଙ୍କ ଠାରୁ ଉତ୍ତରାଧିକାର ସୂତ୍ରରେ ମିଳିଥିବା ବିଶାଳ ଭଣ୍ଡାରରୁ ନିଆଯାଇଥିବା ଜଟିଳ ଛନ୍ଦଯୁକ୍ତ ଉଚ୍ଚାରଣର ମିଶ୍ରଣ । ପରେ ପରେ ତାଙ୍କ ବାଦନରେ ଥିଲା ଫାରୁଖାବାଦ ଘରାନାର ପରମ୍ପରାରେ ଆଧାରିତ ତାଙ୍କ ନିଜସ୍ୱ ବାଦନ ଶୈଳୀର ଏକ ଉପସ୍ଥାପନ । ତାଙ୍କ ସହିତ ହିରଣ୍ମୟ ମିତ୍ରଙ୍କ ସୁସଙ୍ଗତ ହାରମୋନିୟମ୍‌ ବାଦନ ଉପସ୍ଥିତ ଦର୍ଶକଙ୍କୁ ବିମୋହିତ କରିଥିଲା । କାର୍ଯ୍ୟକ୍ରମଟିକୁ ପରିଚାଳନାରେ ସାହାଯ୍ୟ କରିଥିଲେ ଦେବୀପ୍ରସାଦ ମିଶ୍ର ଏବଂ ଉପସ୍ଥାପନ କରିଥିଲେ ଡ଼ଃ. ମୃତ୍ୟୁଞ୍ଜୟ ରଥ ।