ଭୀମପଡା ରଶ୍ମିରଞ୍ଜନ ହତ୍ୟାକାଣ୍ଡ ଘଟଣା:
ସମଲିଙ୍ଗୀ ସମ୍ପର୍କ ପାଇଁ ହତ୍ୟା କଲା କିନ୍ନର ବନ୍ଧୁ
ଯାଜପୁର ରୁ କିନର ସୋମନାଥ ଗିରଫ
ଖୋର୍ଦ୍ଧା : ଜୀବନ ନେଲା କିନ୍ନର ବନ୍ଧୁ ସହ ସମ୍ପର୍କ। ଜଂକିଆ ଥାନା ଅନ୍ତର୍ଗତ ଶଗଡ଼ଭଙ୍ଗା ଗ୍ରାମ ପଞ୍ଚାୟତ ଭିମପଡ଼ା ଗାଁରେ ଯୁବକ ହତ୍ୟା ଘଟଣାର ପର୍ଦାଫାସ କଲା ଖୋର୍ଦ୍ଧା ପୋଲିସ । ଗତ ଦୁଇ ତାରିଖ ଦିନ ଭୀମପଡାର ରଶ୍ମି ରଞ୍ଜନ ବଳିଆରସିଂଙ୍କୁ ତାଙ୍କ ବନ୍ଧୁ ହତ୍ୟା କରିଥିବା ନେଇ ସାରା ଜିଲାରେ ସୃଷ୍ଟି କରିଥିଲା ଚାଞ୍ଚଲ୍ୟ । ପୋଲିସ ଏହାକୁ ଗୁରୁତର ସହ ନେଇ ଏସ୍ଡିପିଓଙ୍କ ନେତୃତ୍ୱରେ ୩ସ୍ୱତନ୍ତ୍ର ଟିମ ଗଠନ କରାଯାଇଥିଲା । ଅଭିଯୁକ୍ତ ହତ୍ୟାକାଣ୍ଡ ଘଟାଇବା ପରେ ରାମେଶ୍ୱର ଛକରେ ଛାଡି ଦେଇଥିଲା ବାଇକ । ସେଠାରୁ ଏକ ଅଟୋ ଯୋଗେ ଯାଜପୁର ପଳାଇଥିଲା। ଅଭିଯୁକ୍ତକୁ ଯାଜପୁରରୁ ଗିରଫ କରିଥିଲା ଖୋର୍ଦ୍ଧା ପୋଲିସ । ଆଜି ଏହି ଘଟଣାର ସାମ୍ବାଦିକ ସମ୍ମିଳନୀ ମାଧ୍ୟମରେ ହତ୍ୟାର ରହସ୍ୟ ଖୋଲିଛି ଖୋର୍ଦ୍ଧା ପୋଲିସ । ଅଭିଯୁକ୍ତ ସୋମନାଥ ଲାଠ ଜଣେ କିନ୍ନର । ସୋମନାଥ ଓ ରଶ୍ମି ଉଭୟ ଥିଲେ କଳାକାର ଓ ବିଭିନ୍ନ ନାଟକରେ ମିଶି କରୁଥିଲେ ଅଭିନୟ । 2017ରୁ ଉଭୟଙ୍କ ମଧ୍ୟରେ ଶାରୀରିକ ସମ୍ପର୍କ । କିନ୍ତୁ କିଛି ଦିନ ତଳେ ଏମାନଙ୍କ ଭିତରେ ପଶି ଆସିଥିଲେ ଜଣେ ଯୁବତୀ କଳାକାର । ଯାହାକୁ ସହ୍ୟ କରିପାରି ନଥିଲେ କିନ୍ନର ବନ୍ଧୁ ସୋମନାଥ ଲାଠ । ମୃତ ରଶ୍ମିଙ୍କ ସହ ଯୁବତୀଙ୍କ ସମ୍ପର୍କକୁ ନେଇ ଉଭୟ ରଶ୍ମି ଓ ସାମନାଥଙ୍କ ମଧ୍ୟରେ ଲାଗି ରହିଥିଲା ବିବାଦ । ଯାହାକୁ ନେଇ ଏଭଳି ଜଘନ୍ୟ ହତ୍ୟାକାଣ୍ଡ ଘଟିଥିବା ଆଜି ଜଙ୍କିଆ ଥାନାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଖୋର୍ଦ୍ଧା ଅତିରିକ୍ତ ଏସ୍ପି ସୁରେନ୍ଦ୍ର ନାଥ ମୁର୍ମୁ ସୂଚନା ଦେଇଛନ୍ତି ।