ଓଡ଼ିଶା ଲଲିତ କଳା ଏକାଡେ଼ମୀର ନୂଆଁଖାଇକୁ ନେଇ ଚିତ୍ରକଳା ପ୍ରଦର୍ଶନୀ
୩୦ ଜଣ ଶିଳ୍ପୀଙ୍କ କାନ୍‌ଭାସ୍‌ରେ ନୂଆଁଖାଇର ଝଲକ

ଭୁବନେଶ୍ୱର:ସମ୍ବଲପୁର,୧୯/୯: ନୂଆଁଖାଇ ପଶ୍ଚିମଓଡ଼ିଶାର ଏକ ପ୍ରସିଦ୍ଧ ଗଣପର୍ବ । ଏହି ଅବସରରେ ସମସ୍ତେ ଉତ୍ସବମୁଖର ହୋଇଥା’ନ୍ତି । ନୂଆଁଖାଇ ପାଇଁ ଓଡ଼ିଶା ଲଳିତ କଳା ଏକାଡେ଼ମୀ, ଓଡ଼ିଆ ଭାଷା ସାହିତ୍ୟ ଓ ସଂସ୍କୃତି ବିଭାଗ ଦ୍ୱାରା ଏବଂ ଜିଲ୍ଲା ପ୍ରଶାସନର ସହଯୋଗରେ ଏକାଡେ଼ମୀର ଆଞ୍ଚଳିକ ଆର୍ଟ ଗେଲେରୀ, ଗୌରୀଶଙ୍କର ସାହାଣୀ ପାର୍କ ସମ୍ବଲପୁର ଠାରେ ଉଦ୍‌ଘାଟିତ ହୋଇଯାଇଛି ଏକ ସମସାମୟିକ ଚିତ୍ରକଳା ପ୍ରଦର୍ଶନୀ । ଉକ୍ତ ପ୍ରଦର୍ଶନୀକୁ ମୁଖ୍ୟଅତିଥି ରୂପେ ବରିଷ୍ଠ ଚିତ୍ରଶିଳ୍ପୀ ଦୁର୍ଗାଚରଣ ପଣ୍ଡା, ପ୍ରଦୀପ ପ୍ରଜ୍ଜ୍ୱଳନ ପୂର୍ବକ ଉଦ୍‌ଘାଟନ କରିଥିଲେ । ପ୍ରାରମ୍ଭରେ ଏକାଡେ଼ମୀର ସଚିବ ପଞ୍ଚାନନ ସାମଲ ଅତିଥି ପରିଚୟ ପ୍ରଦାନ କରିବା ସହ ପୁଷ୍ପଗୁଚ୍ଛ ପ୍ରଦାନ ପୂର୍ବକ ସ୍ୱାଗତ କରିଥିଲେ । ସମ୍ବଲପୁର ଜିଲ୍ଲା ସଂସ୍କୃତି ଅଧିକାରୀ ସୂର୍ଯ୍ୟକାନ୍ତ ବରାଳ କାର୍ଯ୍ୟକ୍ରମ ପରିଚାଳନା କରିଥିଲେ । ମୁଖ୍ୟ ଅତିଥି ଏହି ଅବସରରେ ଶିଳ୍ପୀମାନଙ୍କ ଦ୍ୱାରା ନୂଆଁଖାଇ ବିଷୟବସ୍ତୁ ଉପରେ ଆଧାରିତ ଚିତ୍ରଗୁଡ଼ିକୁ ବୁଲି ଦେଖିବା ସହ ଚିତ୍ରଗୁଡ଼ିକର ଭୂୟସୀ ପ୍ରଶଂସା କରିଥିଲେ । ଚିତ୍ର ସମୂହରେ ମାଁ ସମଲେଶ୍ୱରୀଙ୍କ ସହ ସମ୍ବଲପୁରର ସଂସ୍କୃତି ଓ ନୂଆଁଖାଇର ନିଖୁଣ ପ୍ରଦର୍ଶନ ହୋଇଥିଲା । ‘ନୂଆଁଖାଇ’ ପର୍ବ ଚାଷକୁ ନେଇ ମୁଖ୍ୟତଃ ପାଳନ ହେଉଥିବାରୁ ଅନେକ ଶିଳ୍ପୀ ଧାନବିଲରେ ଧାନଫସଲକୁ ପୂଜା କରୁଥିବାର ଦୃଶ୍ୟ, ଘରେ ଶସ୍ୟକୁ ପୂଜା କରିବା ସହ ନୂଆ ଧାନ ଭୋଗ ଲଗାଇବାର ଦୃଶ୍ୟ, ପିଠାପଣା, କାନ୍ଥରେ ଝୋଟି ସହ ପୂଜାର୍ଚ୍ଚନା, ନୂଆଁଖାଇର ମାହାତ୍ମ୍ୟ ଆଦି ବିଷୟବସ୍ତୁକୁ ସୃଜନଶୀଳ ଭଙ୍ଗୀରେ ନିଜ କାନ୍‌ଭାସ୍‌ ଉପରେ ସୁନ୍ଦର ଭାବରେ ଅଙ୍କନ କରିଛନ୍ତି । ପ୍ରଦର୍ଶନୀ ଅବସରରେ ଶିଳ୍ପୀମାନଙ୍କୁ ଅଙ୍ଗବସ୍ତ୍ର, ମାନପତ୍ର ଓ ପୁଷ୍ପଗୁଚ୍ଛ ପ୍ରଦାନ କରି ସମ୍ବର୍ଦ୍ଧିତ କରାଯାଇଥିଲା । ଏହି ପ୍ରଦର୍ଶନୀ ସେପ୍ଟେମ୍ବର ୩୦ ତାରିଖ ପର୍ଯ୍ୟନ୍ତ ପ୍ରତ୍ୟହ ସକାଳ ୧୧ଟାରୁ ସନ୍ଧ୍ୟା ୭ଟା ପର୍ଯ୍ୟନ୍ତ ସାଧାରଣ ଦର୍ଶକଙ୍କ ପାଇଁ ଖୋଲା ରହିବ ।