ପଦାରେ ପଡ଼ିଲା ବିଜେଡ଼ି ର ବିଜେପି ପ୍ରୀତି – ଶରତ ପଟ୍ଟନାୟକ

ବିଜେଡ଼ିର ବିଜେପି ମୋହ ଓଡ଼ିଶାବାସୀଙ୍କ ପାଖେ ଆଉ ଅଛପା ନାହିଁ

ଭୁବନେଶ୍ୱର ତା. ୦୨.୦୮- ବିଜୁଜନତା ଦଳ କେବଳ ମହିଳାମାନଙ୍କ ପାଇଁ କୁମ୍ଭୀର କାନ୍ଦଣା କାନ୍ଦେ । ମହିଳା ମାନଙ୍କର ଆତ୍ମ ସମ୍ମାନ, ସ୍ୱାଭିମାନ କୁ ରକ୍ଷା କରିବାପାଇଁ ବିଜୁ ଜନତା ଦଳ ଏବଂ ଏହାର ନେତା ନବୀନ ପଟ୍ଟନାୟକଙ୍କର ସାମାନ୍ୟତମ ନିଷ୍ଠା ନାହିଁ ବୋଲି ଆଜି ପ୍ରମାଣିତ ହୋଇଛି ବୋଲି ପ୍ରଦେଶ କଂଗ୍ରେସ ସଭାପତି ଶ୍ରୀ ଶରତ ପଟ୍ଟନାୟକ କହିଛନ୍ତି । କେନ୍ଦ୍ରର ନରେନ୍ଦ୍ର ମୋଦିଙ୍କ ସରକାର ବିରୁଦ୍ଧରେ ଇଣ୍ଡିଆ ମେଣ୍ଟ ତରଫରୁ ଯେଉଁ ଅନସ୍ଥା ପ୍ରସ୍ତାବ ଆଗତ କରାଯାଇଥିଲା ତାହାକୁ ବାଚସ୍ପତି ଗ୍ରହଣ କଲାପରେ ବିଜୁ ଜନତା ଦଳର ଲୋକସଭାର ସାଂସଦ ଶ୍ରୀ ପିନାକୀ ମିଶ୍ର ଏବଂ ରାଜ୍ୟ ସଭାର ସାଂସଦ ଶ୍ରୀ ସସ୍ମିତ ପାତ୍ର ଯେଉଁ ବିବୃତି ରଖିଛନ୍ତି ଏଥିରୁ ସ୍ପଷ୍ଟ ପ୍ରମାଣିତ ବିଜୁ ଜନତା ଦଳର ରକ୍ତ ମାଂସ ହାଡ଼ରେ ମହିଳା ବିରୋଧି ମାନସିକତା ଭରି ରହିଛି । ଇଣ୍ଡିଆ ମେଣ୍ଟ ଯେଉଁ ଅନସ୍ଥା ପ୍ରସ୍ତାବ ସଂସଦରେ ଆଗତ କରିଛନ୍ତି ତାହା କେବଳ ମଣିପୁର ଲୋମହର୍ଷଣକାରୀ ଘଟଣା ଏବଂ ଯେଉଁଭଳି ଭାବରେ ମହିଳା ମାନଙ୍କୁ ଉଲଗ୍ନ କରି ରାସ୍ତାରେ ଚଲାଗଲା, ବହୁ ସଂଖ୍ୟକ ମହିଳାଙ୍କୁ ଗଣଧର୍ଷଣ ଏବଂ ବହୁ ଜୀବନ ଅକାଳରେ ଝରିପଡ଼ିଲା ଏହାକୁ ସଂସଦରେ ଆଲୋଚନା କରିବାପାଇଁ ।
ପ୍ରକାଶ ଥାଉକି ସଂସଦର ୮ ଦିନ ପରେ ମଧ୍ୟ ପ୍ରଧାନମନ୍ତ୍ରୀ ଏଭଳି ଲୋମହର୍ଷଣକାରୀ ଘଟଣା ବାବଦରେ ସଂସଦରେ ପଦୁଟିଏ କଥା ନରଖିବା ଗଣତାନ୍ତ୍ରିକ ବିଧିବ୍ୟବସ୍ଥାକୁ ସଂପୂର୍ଣ୍ଣ କୋଠାରଘାତ କରିଛି । କିନ୍ତୁ ଗଣତାନ୍ତ୍ରିକ ମର୍ଯ୍ୟାଦାକୁ ରକ୍ଷା କରିବା ପରିବର୍ତେ ବିଜୁ ଜନତା ଦଳ ଏଭଳି ଲୋମହର୍ଷଣକାରୀ ଘଟଣାରେ ଅନ୍ଧ ଭାବରେ ବିଜେପିକୁ ସମର୍ଥନ କରିବା ହିଁ ନାରୀ ଜାତି ପ୍ରତି ଥିବା ବିଜୁ ଜନତା ଦଳର ଅସଲ ଚରିତ୍ରକୁ ପଦାରେ ପକାଇଛି । ବିଜେଡ଼ି ବିଜେପି ଏକ ଏବଂ ବିଜେଡ଼ିର ବିଜେପି ମୋହ ଅତୁଟ ବୋଲି ଏହା ପ୍ରମାଣିତ କରୁଛି । କଂଗ୍ରେସ ରାଜ୍ୟର ଜନସାଧାରଣଙ୍କ ସ୍ୱାର୍ଥ ପାଇଁ ଏକାକି ଲଢ଼େଇ କରୁଛି ଓ ରାଜ୍ୟର ଏକମାତ୍ର ବିକଳ୍ପ । ଏହାକୁ ପ୍ରତିବାଦ କରି ଅନସ୍ଥା ପ୍ରସ୍ତାବ ବିରୋଧି ମେଂଟ ଆଣିଛନ୍ତି । ମହିଳାଙ୍କ ସୁରକ୍ଷା, ସ୍ୱାଭିମାନକୁ ରକ୍ଷା କରିବା ଏବଂ ଏଭଳି ପାଶବିକ କାଣ୍ଡରେ ଜଡ଼ିତଥିବା ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ସହିତ ମଣିପୁରରେ ଶାନ୍ତି ଫେରାଇବା ଆଣିବା ହେଉଛି ମୂଳ ଉଦ୍ଦେଶ୍ୟ । ମଣିପୁରରେ ଘଟିଥିବା ମହିଳାଙ୍କ ପାଶବିକ ଅତ୍ୟାଚାର ସମଗ୍ର ମାନବ ଜାତିକୁ ଦୋହଲାଇ ଥିବା ବେଳେ ନବୀନ ବାବୁଙ୍କ ମାନବିକତା ଗଲା କୁଆଡ଼େ ବୋଲି ଶ୍ରୀ ପଟ୍ଟନାୟକ ପ୍ରଶ୍ନ କରିଛନ୍ତି ବୋଲି ଆଜି ପ୍ରଦେଶ କଂଗ୍ରେସ ମୁଖପାତ୍ର ଶ୍ରୀ ରଜନୀ ମହାନ୍ତି ଏକ ପ୍ରେସ ବିଜ୍ଞପ୍ତି ରେ ଜଣାଇଛନ୍ତି ।