ଓଡ଼ିଶା ସ୍ଵାସ୍ଥ୍ୟ ମିଶନ ପରିଚାଳନା କର୍ମଚାରୀ ସଂଘର ଆନ୍ଦୋଳନ ୨୩ ଦିନରେ
ରାଜରାସ୍ତାରେ ପାଳିଲେ ଉତ୍କଳ ଦିବସ
ଆୟୁଷ୍ମାନ କାର୍ଡ ଯୋଜନା ଘୁଞ୍ଚିଲା
ଆଜକୁ ୨୩ ଦିନ ହେଲା ଭୁବନେଶ୍ବର ଗନ୍ଧିମର୍ଗରେ ଓଡ଼ିଶା ସ୍ଵାସ୍ଥ୍ୟ ମିଶନ ପରିଚାଳନା କର୍ମଚାରୀ ସଂଘର ଆନ୍ଦୋଳନ ଚାଲିଛି। ଦୀର୍ଘ ୨୦ ବର୍ଷ ହେବ ଜାତୀୟ ସ୍ଵାସ୍ଥ୍ୟ ମିଶନ ଅଧୀନରେ କାର୍ଯ୍ୟରତ ୪୨୦୦ ପରିଚାଳନା କର୍ମଚାରୀ ମାନେ ଗୋଟାଏ ମାତ୍ର ନ୍ୟାର୍ଯ୍ୟ ଦାବି ସ୍ଥାୟୀ ଚାକିରୀକୁ ନେଇ ଗତ ମାର୍ଚ୍ଚ ୧୦ ତାରିଖରୁ ସାରା ରାଜ୍ୟରେ କାର୍ଯ୍ୟ ବନ୍ଦ ଆନ୍ଦୋଳନ ଚଳାଇଛନ୍ତି। ଏହାଦ୍ବାରା ସ୍ଵାସ୍ଥ୍ୟ ସମସ୍ୟା ଜଟିଳ ହୋଇପଡ଼ିବା ସହିତ ରୋଗୀ ସେବାରେ ବ୍ୟାଘାତ ସୃଷ୍ଟି, ପ୍ରସୂତୀ ମାନଙ୍କ ପ୍ରୋତ୍ସାହନ, ଆଶା ମାନଙ୍କ ପାଉଣା, ଯକ୍ଷ୍ମା ରୋଗୀମାନଙ୍କୁ ଔଷଧ ମିଳିବା ଇତ୍ୟାଦି ବିଭିନ୍ନ ସରକାରୀ ଯୋଜନା ବାଧାପ୍ରାପ୍ତ ହେବାରେ ଲାଗିଛି।
ଆଜି ସାରା ରାଜ୍ୟ ଉତ୍କଳ ଦିବସ ପାଳନ କରୁଥିବା ବେଳେ ଏମାନେ ରାଜରାସ୍ତାରେ ଶୃଙ୍ଖଳାର ସହିତ ବନ୍ଦେ ଉତ୍କଳ ଜନନୀ ସଙ୍ଗୀତ ପରିବେଷଣ କରି ଉତ୍କଳ ଦିବସକୁ ପାଳନ କରିଛନ୍ତି। ସଂଘର ରାଜ୍ୟ ସଭାପତି ଅନିରୁଦ୍ଧ ପଣ୍ଡା ଙ୍କ କହିବା ଅନୁଯାୟୀ ୨୦୧୭ ମସିହାର କେନ୍ଦ୍ରସରକାରଙ୍କ ନିୟମ ଅନୁସାରେ ଜନସ୍ୱାସ୍ଥ୍ୟ ପରିଚାଳନା ପଦବୀ ସୃଷ୍ଟି କରି ଆମକୁ ସ୍ଥାୟୀ କରିବା ରାଜ୍ୟ ସରକାରଙ୍କ ଦାୟିତ୍ୱ। ଏହାକୁ ପାଳନ କରିବାକୁ ଯାଇ ପୂର୍ବ ସରକାର କମିଟି ଗଠନ କରି ୨୦୧୯ ରୁ ୨୦୨୩ ମଧ୍ୟରେ ୬ଥର ବୈଠକ ସରିଥିଲେ ମଧ୍ୟ ଆଜି ପର୍ଯ୍ୟନ୍ତ ଲାଗୁ ହୋଇ ପାରିଲା ନାହିଁ। କିନ୍ତୁ ୨୦୨୨ ମସିହାରେ ଜାତୀୟ ସ୍ଵାସ୍ଥ୍ୟ ମିଶନରୁ ପ୍ରାୟ ୬୦୦୦ ରୁ ଉର୍ଦ୍ଧ କର୍ମଚାରୀ ମାନଙ୍କୁ ପୂର୍ବ ସରକାର ସ୍ଥାୟୀ କରିଥିଲେ ତାହେଲେ ଆମକୁ କାହିଁକି ଅବହେଳା।
ବର୍ତ୍ତମାନର ନୂତନ ସରକାରଙ୍କୁ ଗତ ନଭେମ୍ବର ମାସରୁ ବାରମ୍ବାର ଦାବୀପତ୍ର ପ୍ରଦାନ କରି ଆମ ଦାବୀ ସମ୍ପର୍କରେ ଅବଗତ କରାଇଥିଲେ ମଧ୍ଯ ଆଜି ପର୍ଯ୍ୟନ୍ତ କୌଣସି ପଦକ୍ଷେପ ଗ୍ରହଣ କରାଯାଇନଥିବାରୁ ବାଧ୍ୟହୋଇ ସଂଘର ଡାକରା ଅନୁଯାୟୀ କାର୍ଯ୍ୟବନ୍ଦ ଆନ୍ଦୋଳନ ଚାଲିଛି ଆଉ ଯେତେ ପର୍ଯ୍ୟନ୍ତ ଦାବୀ ପୂରଣ ନହୋଇଛି ଏ ଆନ୍ଦୋଳନ ଚାଲିବ ବୋଲି ସଂଘର ସଭାପତି ଅନିରୁଦ୍ଧ ପଣ୍ଡା ଙ୍କ ସମେତ ଅନ୍ୟ କର୍ମକର୍ତା ମାନେ ସ୍ପଷ୍ଟ କରିଛନ୍ତି। ଏହାରି ମଧ୍ୟରେ ଶାନ୍ତିପୂର୍ଣ୍ଣ ଆନ୍ଦୋଳନ ଚାଲିଥିବା ବେଳେ ସ୍ଵାସ୍ଥ୍ୟ ମିଶନ ନିର୍ଦେଶିକା ଆନ୍ଦୋଳନକୁ ଭଙ୍ଗ କରିବା ପାଇଁ ବିଭିନ୍ନ ପ୍ରକାର ଧମକପୂର୍ଣ୍ଣ ଚିଠି ବାହାର କରିବା ଓ ମିଶନ କାର୍ଯ୍ୟାଳୟରୁ ବିଭିନ୍ନ ଜିଲ୍ଲା ଅଧିକାରୀଙ୍କୁ ଫୋନ କରି କାର୍ଯ୍ୟରେ ଯୋଗ ଦେବାକୁ ବାଧ୍ୟ କରିବା ତାଙ୍କର ପାରିବା ପଣିଆ ଉପରେ ପ୍ରଶ୍ନବାଚୀ ସୃଷ୍ଟି କରିଛି। ତେଣୁ ସରକାର ତୁରନ୍ତ ଆମ ବିଷୟରେ ବିଚାର କରି ସମାଧାନ କରିବାକୁ ସଂଘ ତରଫରୁ ମାନ୍ୟବର ମୁଖ୍ୟମନ୍ତ୍ରୀ, ସ୍ୱାସ୍ଥ୍ୟମନ୍ତ୍ରୀଙ୍କୁ ନିବେଦନ କରିଛନ୍ତି।