୧୦୮ ଆମ୍ବୁଲାନ୍ସ କର୍ମଚାରୀଙ୍କ ମାନବିକତା, ବାତ୍ୟାବେଳେ ରୋଗୀଙ୍କୁ ନିଜ କୋଳରେ ନେଇ ଆମ୍ବୁଲାନ୍ସରେ ପହଞ୍ଚାଇଲେ ଡ୍ରାଇଭର
ଭୁବନେଶ୍ୱର:କେନ୍ଦ୍ରାପଡା: କର୍ମ ଆଗରେ ଫିକା ପଡିଲା ବାତ୍ୟା “ଦାନା” ର ତାଣ୍ଡବ । ଜଣେ ରୋଗୀଙ୍କୁ ନିଜ କୋଳରେ କୋଳେଇ ନେଇ ଦୀର୍ଘ ବାଟ ଅତିକ୍ରମ କରି ଆମ୍ବୁଲାନ୍ସ ପର୍ଯ୍ୟନ୍ତ ପହଞ୍ଚାଇଲେ ଆମ୍ବୁଲାନ୍ସ ଡ୍ରାଇଭର । ଯେଉଁଥି ପାଇଁ ସମସ୍ତେ କହୁଛନ୍ତି ସାବାସ୍ “ମାନସ” । କେନ୍ଦ୍ରାପଡା ଜିଲ୍ଲା ଗରଦପୁର ବ୍ଲକ ଅନ୍ତର୍ଗତ ନଗରୀପଡା ଅଂଚଳର ମାନସ ମଲ୍ଲିକ । ପେସାରେ ଜଣେ 108 ଆମ୍ବୁଲାନ୍ସ ଡ୍ରାଇଭର । ସେଥିରୁ ଯାହା ମିଳେ ପରିବାର ପ୍ରତିପୋଷଣ କରିବାରେ ଅସମର୍ଥ । କିନ୍ତୁ କର୍ମ ତାଙ୍କର ମହାନ। ବାତ୍ୟା ଦାନା ପାଇଁ ସମସ୍ତ ସରକାରୀ କର୍ମଚାରୀ ତତ୍ପର ଥିବାବେଳେ ମାନସଙ୍କ କର୍ମତତ୍ପରତାର ଦୃଶ୍ୟ ସଭିଙ୍କୁ ଚକିତ କରିଥିଲା । ବାତ୍ୟା ସମୟରେ, ରାଜନଗର ଅଂଚଳରେ ଗଛ ପଡିଯାଇ ରାସ୍ତା ଅବରୋଧ ଥିବାରୁ ଜଣେ ରୋଗୀଙ୍କୁ ତାଙ୍କ ଘରୁ ନିଜ କୋଳରେ କୋଳେଇ ଆଣି ଆମ୍ବୁଲାନ୍ସ ଯୋଗେ ଡାକ୍ତରଖାନା ପର୍ଯ୍ୟନ୍ତ ପହଞ୍ଚାଇଥିଲେ । ଯେଉଁ ଦୃଶ୍ୟ ଏବେ ସାମାଜିକ ଗଣମାଧ୍ୟମରେ ବେଶ ଭାଇରାଲ ହେବାରେ ଲାଗିଛି । ଆଉ ସେହି ଦୃଶ୍ୟ କୁ ଯିଏ ବି ଦେଖୁଛନ୍ତି ସିଏ କହୁଛନ୍ତି ସାବାସ୍ ମାନସ ।