ଛାତ୍ର ସଂସଦ ନିର୍ବାଚନ ଦାବିରେ ରାସ୍ତାକୁ ଓହ୍ଲାଇବ ଛାତ୍ର କଂଗ୍ରେସ
ଭୁବନେଶ୍ୱର ତା. ୪.୯- ଆଜି ପ୍ରଦେଶ କଂଗ୍ରେସ କାର୍ଯ୍ୟାଳୟରେ ପ୍ରଦେଶ ଛାତ୍ର କଂଗ୍ରେସ ସଭାପତି ଉଦିତ ପ୍ରଧାନ ଏକ ସାମ୍ବାଦିକ ସମ୍ମିଳନୀରେ କହିଲେ ଯେ ଆଇନ ମନ୍ତ୍ରୀ ଏବର୍ଷ ଛାତ୍ର ସଂସଦ ନିର୍ବାଚନ ନ ହେବା ନେଇ ଘୋଷଣା କରିବା ଦୁର୍ଭାଗ୍ୟଜନକ । ବିଜେଡ଼ି ରାସ୍ତାରେ ବିଜେପି ସରକାର ଯାଉଛି ବୋଲି ଶ୍ରୀ ପ୍ରଧାନ ଅଭିଯୋଗ କରିଛନ୍ତି । ଗତ ୨୦୧୭ ମସିହାରେ ଶେଷ ନିର୍ବାଚନ ହୋଇଥିଲା । ୧୮ ଅଗଷ୍ଟ୨୦୧୭ ତାରିଖରେ ନିର୍ବାଚନ ସିଡୁଲ ଘୋଷଣା କରାଯାଇଥିଲା । ୨୦୨୪ ରେ ଅଗଷ୍ଟ ୧୯ ତାରିଖ ଦିନ ନିର୍ବାଚନ ହେବ ନାହିଁ ବୋଲି ଆଇନ ମନ୍ତ୍ରୀ ଘୋଷଣା କଲେ । ମାତ୍ର ଗୋଟିଏ ଦିନ ପରେ କହିଲେ ଯେ ନୂଆ ସରକାର, ସମୟର ଅଭାବ ଏବଂ ପ୍ରସ୍ତୁତିର ଅଭାବ ପାଇଁ ନିର୍ବାଚନ ହୋଇପାରିବ ନାହିଁ । ମୂଳ କଥାଟି ହେଉଛି ସରକାରୀ କଳକୁ ଲଗାଇ ସମସ୍ତ ସରକାରୀ ଏବଂ ଅନୁଦାନ ପ୍ରାପ୍ତ ମହାବିଦ୍ୟାଳୟ ମାନଙ୍କୁ କବଜା କରିବାପାଇଁ ଷଡ଼ଯନ୍ତ୍ର ଚାଲିଛି । ସେଥିପାଇଁ ଆରବର୍ଷ ନିର୍ବାଚନ କରିବାପାଇଁ କୁହାଗଲା । ହୁଏତ ଆରବର୍ଷ ନିର୍ବାଚନ ନ ହୋଇବି ପାରେ । ଯେପରି ବିଭିନ୍ନ ଆଳରେ ୨୦୧୭ ମସିହା ଠାରୁ ୨୦୨୩ ମସିହା ପର୍ଯ୍ୟନ୍ତ ବିଜେଡ଼ି ସରକାର ରାଜ୍ୟରେ ବିଭିନ୍ନ ଆଳନେଇ ନିର୍ବାଚନ ବନ୍ଦ କଲେ । କ୍ୟାମ୍ପସରେ ହିଂସା ଆଳରେ ୨୦୧୯, ୨୦୨୨ ଓ ୨୦୨୩ ରେ ଛାତ୍ର ସଂସଦ ନିର୍ବାଚନକୁ ବନ୍ଦ କରିଦିଆଗଲା । ୨୦୨୦ ଓ ୨୦୨୧ରେ କରୋନା ପାଇଁ ଏବଂ ୨୦୧୮ରେ ତିତିଲି ମହାବାତ୍ୟା ପାଇଁ ନିର୍ବାଚନ ବନ୍ଦ ହୋଇଥିଲା । ଏଠାରେ ଉଲ୍ଲେଖ୍ୟ ଯୋଗ୍ୟଯେ ଏବିଭିପି ଛାତ୍ର ସଂସଦ ନିର୍ବାଚନ ପୂର୍ବରୁ ହାଇକୋର୍ଟରେ କେସ କରିଥିଲା ମାତ୍ର ଏବେ ଏହାର ଆଭିମୁଖ୍ୟ ବଦଳି ଯାଇଛି । ଉଚ୍ଚଶିକ୍ଷା ମନ୍ତ୍ରୀଙ୍କ ନିର୍ବାଚନ ବନ୍ଦ ଘୋଷଣାକୁ ଏବିଭିପି ପକ୍ଷରୁ ସ୍ୱାଗତ କରାଯାଇଛି ।
ଶ୍ରୀ ପ୍ରଧାନ କହିଛନ୍ତିଯେ ଛାତ୍ର ମାନଙ୍କର ଗଣତନ୍ତ୍ର ଅଧିକାରକୁ ଏହାଦ୍ୱାରା ହତ୍ୟା କରାଯାଉଛି । ପୂର୍ବରୁ ଛାତ୍ର ବିଜେଡ଼ିର କର୍ମକର୍ତାମାନେ କଲେଜ ଓ ୟୁନିର୍ଭସିଟିରେ ଅପରାଧିକ କାର୍ଯ୍ୟ କରୁଥିଲେ । ହସଟେଲ ଅସୁରକ୍ଷିତ ଥିଲା । ଛାତ୍ରୀମାନେ ନିଜକୁ କ୍ୟାମ୍ପସରେ ସୁରକ୍ଷିତ ମନେ କରୁଥିଲେ । କ୍ୟାମ୍ପସରେ ର‌୍ୟାଗିଂ ଚାଲୁଥିଲା । ର‌୍ୟାଗିଂ କ୍ଷେତ୍ରରେ ଦେଶରେ ଓଡ଼ିଶାର ସ୍ଥାନ ତୃତୀୟ । ବିଜେବିି କଲେଜର ଛାତ୍ରୀ ରୁଚିକା ମହାନ୍ତି ର‌୍ୟାଗିଂରେ ଶିକାର ହୋଇ ଆତ୍ମହତ୍ୟା କଲେ । ବିଜୁ ଛାତ୍ର ଜନତା ଛାତ୍ର ସଂଗଠନ ପକ୍ଷରୁ କ୍ୟାମ୍ପସ କମିଟି କରାଯାଇ ସବୁ ସରକାରୀ ଶିକ୍ଷାନୁଷ୍ଠାନରେ ଦୌରାତ୍ମ୍ୟ କରାଯାଉଥିଲା । କ୍ୟାମ୍ପସ କମିଟିର ସଭ୍ୟମାନେ ର‌୍ୟାଗିଂ କରୁଥିଲେ । ଶିକ୍ଷାନୁଷ୍ଠାନର ଉନ୍ନୟନମୂଳକ କାର୍ଯ୍ୟପାଇଁ ଆସୁଥିବା ସରକାରୀ ଅର୍ଥକୁ ହଡ଼ପ କରାଯାଉଥିଲା । ରମାଦେବୀର ପାଚେରୀ ନିର୍ମାଣର ଦୁଇଦିନ ମଧ୍ୟରେ ଭୁଷୁଡ଼ି ପଡ଼ିବା ଏବଂ ଉôଦଘାଟନ ଦିନ ବାଙ୍କ ସ୍ୱୟଂ ଶାସିତ ମହାବିଦ୍ୟାଳୟର ଖେଳପଡ଼ିଆର ଗ୍ୟାଲେରି ଭୁଷୁଡ଼ି ପଡ଼ିବା ଘଟଣାରୁ ଏହା ସ୍ପଷ୍ଟ ।
ଓଡ଼ିଶାର ସମସ୍ତ ସରକାରୀ କଲେଜ ଓ ୟୁନିଭର୍ସିଟି ଏବଂ ଅନୁଦାନ ପ୍ରାପ୍ତ କଲେଜ ମାନଙ୍କରେ ଶିକ୍ଷକ ଓ ଅଣଶିକ୍ଷକ ପଦବୀରେ ଘୋର ଅଭାବ ରହିଛି । ଭିର୍ତିଭୁମି ଅତ୍ୟନ୍ତ ଦୁର୍ବଳ । ସୁତରାଂ ଛାତ୍ରମାନଙ୍କର ସ୍ୱାର୍ଥ ଏବଂ ଶିକ୍ଷାନୁଷ୍ଠାନର ଉନ୍ନତି ପାଇଁ ସ୍ୱର ଉତୋଳନ କରିବାପାଇଁ ଛାତ୍ର ପ୍ରତିନିଧି ମାନଙ୍କର ଆବଶ୍ୟକତା ରହିଛି । ନିର୍ବାଚିତ ଛାତ୍ର ପ୍ରତିନିଧି ନ ରହିଲେ ଶିକ୍ଷାନୁଷ୍ଠାନରେ ଉନ୍ନତି ଓ ଶୃଙ୍ଖଳା ସମ୍ଭବପର ନୁହେଁ । ସୁତରାଂ ବିଜେଡ଼ି ପରି ବିଜେପି ସରକାର ମଧ୍ୟ ଛାତ୍ରମାନଙ୍କୁ ତାଙ୍କର ଗଣତାନ୍ତ୍ରିକ ଅଧିକାରରୁ ବଂଚିତ କରିବା ଷଡଯନ୍ତ୍ରକୁ ଛାତ୍ର କଂଗ୍ରେସ ସହ୍ୟ କରିବ ନାହିଁ । ଛାତ୍ର ସଂସଦ ନିର୍ବାଚନ ଦାବିରେ ଛାତ୍ର କଂଗ୍ରେସ ରାଜରାସ୍ତାକୁ ଓହ୍ଲାଇବା ପାଇଁ ନିଷ୍ପତି ଗ୍ରହଣ କରିଛନ୍ତି ବୋଲି ଶ୍ରୀ ପ୍ରଧାନ କହିଛନ୍ତି । କେନ୍ଦ୍ର ଶିକ୍ଷାମନ୍ତ୍ରୀ ରେଭେନ୍ସା ମହାବିଦ୍ୟାଳୟର ନାମ ପରିବର୍ତନ ପାଇଁ ଯେଉଁ ବ୍ୟକ୍ତିଗତ ବକ୍ତବ୍ୟ ଦେଇଥିଲେ ତାହା ନିନ୍ଦନୀୟ ବୋଲି ପ୍ରଦେଶ ଛାତ୍ର କଂଗ୍ରେସର ପୂର୍ବତନ ସଭାପତି ୟାସିର ନୱାଜ କହିଥିଲେ । କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ନାମ ପରିବର୍ତନ ଡ୍ରାମାରେ ନମାତି ରେଭେନ୍ସାକୁ ଏକ କେନ୍ଦ୍ରୀୟ ବିଶ୍ୱବିଦ୍ୟାଳୟରେ ପରିଣତ କରିବାକୁ ଉଦ୍ୟମ କରନ୍ତୁ । କେବଳ ଚର୍ଚ୍ଚାରେ ରହିବାପାଇଁ ଧର୍ମେନ୍ଦ୍ର ପ୍ରଧାନ ଏହି ବକ୍ତବ୍ୟ ଦେଇଛନ୍ତି । ସେ ଶିକ୍ଷମନ୍ତ୍ରୀ ଭାବରେ ତାଙ୍କ ବିଭାଗରେ ଓଡ଼ିଶାରେ କିଛି କରିନାହାନ୍ତି । କେନ୍ଦ୍ର ବିଦ୍ୟାଳୟ ଠାରୁ କେନ୍ଦ୍ରୀୟ ବିଶ୍ୱବିଦ୍ୟାଳୟ ପର୍ଯ୍ୟନ୍ତ ସବୁଠାରେ ଶିକ୍ଷକ ଓ ଅଣଶିକ୍ଷକ ପଦବୀ ପୂରଣ ହୋଇପାରୁ ନାହିଁ । ଠିକା ଶିକ୍ଷକ ପାଠ ପଢ଼ାଉ ଛନ୍ତି ।
ଥମାସ ଏଡୱାଡ ରେଭେନ୍ସା ନିଜ ନାମରେ ଏହି ଶିକ୍ଷାନୁଷ୍ଠାନକୁ ନିଜ ନାମରେ ନାମିତ କରିନଥିଲେ ବରଂ ତାଙ୍କର ଅତୁଲ୍ୟ ଅବଦାନ ପାଇଁ ମୟୁରଭଞ୍ଜ ରାଜା କୃଷ୍ଣଚନ୍ଦ୍ର ଭଞ୍ଜଦେଓ ଏହି ଶିକ୍ଷାନୁଷ୍ଠାନର ନାମ ରେଭେନ୍ସା ରଖିଥିଲେ । ଏହି ଶିକ୍ଷାନୁଷ୍ଠାନରୁ ଅସୁମାରୀ ରାଜନେତା, ବୈଜ୍ଞାନିକ, ସାହିତ୍ୟକ, କବି, ସମାଜସେବୀ ସୃଷ୍ଟି ହୋଇଛନ୍ତି । କେହି ଏଭଳି ବିକୃତ କଥା କହିନଥିଲେ । ଏପରିକି ମଧୁବାବୁ ଏବଂ ପୂର୍ବତନ ମୁଖ୍ୟମନ୍ତ୍ରୀ ହରେକୃଷ୍ଣ ମହତାବ, ନିଳମଣି ରାଉତରାୟ, ନନ୍ଦିନି ଶତପଥି ଏବଂ ଜାନକୀ ବଲ୍ଲଭ ପଟ୍ଟନାୟକ, ଯେଉଁମାନେକି ଏହି ମଣିଷ ତିଆରି କାରଖାନାରୁ ସୃଷ୍ଟି ହୋଇଛନ୍ତି ସେମାନେ କେବେ ରେଭେନ୍ସା କଲେଜର ନାମ ପରିବର୍ତନ କଥା କହିନଥିଲେ । ଫକୀର ମୋହନ ତାଙ୍କ ଉତ୍କଳ ଭ୍ରମଣ କବିତାରେ ରେଭେନ୍ସାଙ୍କର ଗୁଣଗାନ କରିଛନ୍ତି । ରେଭେନ୍ସା ଓଡ଼ିଶାରେ ଶିକ୍ଷାର ପ୍ରଚଳନ ପାଇଁ ପ୍ରଶ୍ନସନୀୟ ଉଦ୍ୟମ କରିଥିଲେ । ସେ ଏହି ଶିକ୍ଷାନୁଷ୍ଠାନର ନାମ କଟକ କଲେଜ ବୋଲି ଦେଇଥିଲେ । କୃଷ୍ଣଚନ୍ଦ୍ର ଭଞ୍ଜ ଦେଓ ଏହି ଶିକ୍ଷାନୁଷ୍ଠାନର ନାମ ରେଭେନ୍ସା ଦେଇଥିଲେ । ଏଣୁ ଏଥିରେ ରେଭେନ୍ସାଙ୍କର ଦୋଷ କଉଠି ରହିଲା । କେବଳ ସେତିକି ନୁହେଁ ନାରୀ ଶିକ୍ଷା ପାଇଁ ସେ ରେଭେନ୍ସା ବାଳିକା ବିଦ୍ୟାଳୟ ମଧ୍ୟ କରିଥିଲେ । ରେଭେନ୍ସା କଲେଜୟଟ ସ୍କୁଲ ମଧ୍ୟ ତାଙ୍କର ଅବଦାନ । ନାମ ବଦଳାଇ ଦେଲେ ଶିକ୍ଷାନୁଷ୍ଠାନର ଶୈଖିକ ବାତାବରଣ ବଦଳିଯିବ ନାହିଁ । ଶିକ୍ଷାମନ୍ତ୍ରୀ ଏହି ବିକୃତ ମାନସିକତାରୁ ନିବୃତ ରୁହନ୍ତୁ ବୋଲି ୟାସିର ନୱାଜ କହିଛନ୍ତି । ଏହି ସାମ୍ବାଦିକ ସମ୍ମିଳନୀରେ ବିଶ୍ୱଭୂଷଣ ମହାପାତ୍ର ଏବଂ ଶ୍ରୀକାନ୍ତ ବିଶ୍ୱାଳ ଉପସ୍ଥିତ ଥିଲେ ।