ବଦଳିଲା ପାଣିପାଗ, ଆଜିଠୁ ସକାଳ ୧୦ଟାରେ ବାଜିବ ସ୍କୁଲ୍‌ ଘଣ୍ଟି

ଭୁବନେଶ୍ୱର: ନଇଁଲା ଖରା; ବଦଳିଲା ପାଗ। ଗ୍ରୀଷ୍ମାବକାଶ ପରେ ଆସନ୍ତାକାଲି ଅର୍ଥାତ୍‌ ସୋମବାରଠାରୁ ୧୦ଟାରେ ବାଜିବ ସ୍କୁଲ ଘଣ୍ଟି; ଆରମ୍ଭ ହେବ ପାଠପଢ଼ା। ରାଜ୍ୟ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ମଧ୍ୟ ଏହାର ଇଙ୍ଗିତ ଦେଇଛନ୍ତି। ସମ୍ପ୍ରତି ରାଜ୍ୟରେ ପାଣିପାଗ ବଦଳିଛି। ପ୍ରାୟ ସମସ୍ତ ଅଞ୍ଚଳରେ ବର୍ଷା ହେବା ପରେ ତାପମାତ୍ରା ହ୍ରାସ ପାଇଛି। ତେଣୁ ସ୍ୱାଭାବିକ ସମୟରେ ସ୍କୁଲ ଖୋଲିବାରେ କିଛି ଅସୁବିଧା ନାହିଁ ବୋଲି କହିଛନ୍ତି ଗଣଶିକ୍ଷା ମନ୍ତ୍ରୀ ଶ୍ରୀ ଗଣ୍ଡ। ରାଜ୍ୟରେ ଗ୍ରୀଷ୍ମ ଅବକାଶ ଶେଷ ପରେ ଗତ ୧୮ ତାରିଖରୁ ସ୍କୁଲ୍‌ ଖୋଲାଯାଇଥିଲା। ମାତ୍ର ଗ୍ରୀଷ୍ମ ପ୍ରବାହ ପାଇଁ କିଛି ଜିଲ୍ଲାରେ ସ୍କୁଲ୍‌ ବନ୍ଦ ରହିଥିଲା। ଜିଲ୍ଲାପାଳମାନେ ନିଜ ଜିଲ୍ଲାର ସ୍ଥିତି ଦେଖି ପଦକ୍ଷେପ ନେବାକୁ ରାଜ୍ୟ ସରକାର ମଧ୍ୟ ପରାମର୍ଶ ଦେଇଥିଲେ। ଏହି କ୍ରମରେ ଜିଲ୍ଲାପାଳଙ୍କ ନିର୍ଦ୍ଦେଶାନୁସାରେ ଗରମ ଓ ଗୁଳୁଗୁଳିକୁ ଦେଖି ସକାଳୁଆ ପାଠପଢ଼ା ହେଉଥିଲା। ବିଭିନ୍ନ କାରଣରୁ ଛାତ୍ରଛାତ୍ରୀଙ୍କ ଉପସ୍ଥାନ ମଧ୍ୟ ବହୁତ କମ୍‌ ରହିଥିଲା। ଏଣୁ ପାଠପଢ଼ା ସ୍ୱଭାବିକ ହୋଇପାରି ନଥିଲା। ଏବେ ଅନୁକୂଳ ପାଗ ହେଇଥିବାରୁ ଖରାଛୁଟି ପରେ ପ୍ରଥମ ଥର ପାଇଁ ୧୦ଟାରୁ ଖୋଲିବ ବିଦ୍ୟାଳୟ। ଫଳରେ ବିଦ୍ୟାଳୟରେ ଉପସ୍ଥାନ ବୃଦ୍ଧି ପାଇବା ସହ ପାଠପଢ଼ା ସ୍ୱଭାବିକ ହେବ ବୋଲି ଅଭିଭାବକମାନେ ଆଶାପ୍ରକାଶ କରିଛନ୍ତି।