ବିଜେପିର ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା ସସପେନ୍ସ
ଟୁଇଟ୍ ପରେ ଟୁଇଟ୍ କଲା ବିଜେଡି

ଭୁବନେଶ୍ୱର: ଆଜି ବିଜେପିର ବଡ଼ ପ୍ରେସମିଟ୍ ସକାଳ ୯ଟାରେ ଆରମ୍ଭ ହେବାର ଥିଲା । ଏ ସମ୍ପର୍କରେ ଗଣମାଧ୍ୟମ ପ୍ରତିନିଧିଙ୍କୁ ଆଗୁଆ ସୂଚନା ଦିଆଯାଇଥିଲା । ଓଡ଼ିଶା ବିଜେପିର ୫ ମଙ୍ଗୁଆଳଙ୍କ ପ୍ରେସମିଟ୍ ର ବିଷୟବସ୍ତୁକୁ ନେଇ ସମସ୍ତଙ୍କ ମନରେ ଉତ୍କଣ୍ଠା ଥିଲା । ମାତ୍ର ଘଣ୍ଟାଏ ପୂର୍ବରୁ ସକାଳ ୮ଟା ୯ ମିନିଟ୍ ରେ ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ(ବବି) ଏବଂ ବିଜେଡି ମୁଖପାତ୍ର ତଥା ରାଜ୍ୟସଭା ସାଂସଦ ଡ. ସସ୍ମିତ୍ ପାତ୍ର ଙ୍କର ଦୁଇଟି ପୃଥକ୍ ଏକ୍ସ(ଟୁଇଟ୍) ଆସିଥିଲା ।
ବବି ଲେଖିଥିଲେ, ଓଡ଼ିଶା ବିଜେପି ବିଜୁ ଜନତା ଦଳର ଦାବି ମାନି ନେଇଥିବା ଜାଣି ମତେ ଖୁସି ଲାଗିଲା । ଆଜି ଦିନ ୯ଟା ବେଳେ ଏକ ମିଳିତ ସାମ୍ବାଦିକ ସମ୍ମିଳନୀରେ ଓଡ଼ିଶା ବିଜେପିର ବରିଷ୍ଠ ନେତାମାନେ ଏକାଠି ହୋଇ ୨୦୨୪ ବିଧାନସଭା ନିର୍ବାଚନ ପାଇଁ ସେମାନଙ୍କର ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା କରିବାକୁ ଯାଉଛନ୍ତି ।
ସସ୍ମିତ୍ ଲେଖିଥିଲେ, ଅତ୍ୟନ୍ତ ନିର୍ଭରଯୋଗ୍ୟ ସୂତ୍ରରୁ ଜାଣିବାକୁ ପାଇଲି ଯେ ଆଜି ସକାଳ ୯ଟାରେ ଓଡ଼ିଶା ବିଜେପି ନେତାମାନେ କରୁଥିବା ସାମ୍ବାଦିକ ସମ୍ମିଳନୀରେ ସେମାନଙ୍କର ମୁଖ୍ୟମନ୍ତ୍ରୀ ପ୍ରାର୍ଥୀଙ୍କ ନାଁ ଘୋଷଣା କରିବାକୁ ଯାଉଛନ୍ତି । ଜଣେ ମହିଳା ମୁଖ୍ୟମନ୍ତ୍ରୀ ପ୍ରାର୍ଥୀଙ୍କ ନାଁ ଘୋଷଣା କରାଯାଉଥିବା ଉକ୍ତ ସୂତ୍ରରୁ ଜାଣିବାକୁ ମିଳୁଛି । ଏହା ଭଲ କଥା ଯେ, ସେମାନେ ଜଣେ ମହିଳାଙ୍କ ନାଁ ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ଘୋଷଣା କରୁଛନ୍ତି ।
ତେବେ ସକାଳ ୯ଟାରେ ବିଜେପିର ପ୍ରେସମିଟ୍ ନ ହେବାରୁ ୯ଟା ୫୩ ମିନିଟ୍ ରେ ସସ୍ମିତ୍ ପାତ୍ରଙ୍କର ଆଉ ଏକ ଟୁଇଟ୍ ଆସିଥିଲା । ମୁଖ୍ୟମନ୍ତ୍ରୀ ପ୍ରାର୍ଥୀତ୍ୱକୁ ନେଇ ବରିଷ୍ଠ ବିଜେପି ନେତାଙ୍କ ମଧ୍ୟରେ ହଠାତ୍ କଳହ ଲାଗିବାରୁ ପ୍ରେସମିଟ୍ ପୂର୍ବ ପ୍ରସ୍ତାବିତ ସକାଳ ୯ଟାରେ ହୋଇପାରିନାହିଁ ବୋଲି ସେ ଦର୍ଶାଇଥିଲେ । ରାଜ୍ୟ ବିଜେପିର ଏହା ଦୁଃଖଦ ଅବସ୍ଥା ବୋଲି ସେ ଲେଖିଥିଲେ ।
ଇତିମଧ୍ୟରେ ବିଜେପି ପ୍ରେସମିଟ୍ ସକାଳ ୧୦ଟାରେ ଆରମ୍ଭ ହୋଇଥିଲା ଏବଂ ୧ ଘଣ୍ଟା ବିଳମ୍ବ ହୋଇଥିବାରୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସାମ୍ବାଦିକମାନଙ୍କଠାରୁ କ୍ଷମା ମାଗିନେଇଥିଲେ । ଖରାପ ପାଗ ଯୋଗୁଁ ସେ ସମ୍ବଲପୁରରୁ ଆସିବାରେ ବିଳମ୍ବ ହେଲା ବୋଲି ଜଣାଇଥିଲେ ।

ବିଜେପି ପ୍ରେସମିଟ୍ ସରିବା ପରେ ପ୍ରାୟ ସାଢ଼େ ୧୧ଟା ବେଳେ ସସ୍ମିତ ପାତ୍ରଙ୍କର ଆଉ ଏକ ଟୁଇଟ୍ ଆସିଥିଲା । ସେ ଲେଖିଥିଲେ- ଆମେ ଶୁଣିବାକୁ ପାଉଥିଲୁ, ଆଜି ଓଡ଼ିଶା ବିଜେପି ତାର ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା କରିବ । ହେଲେ ଏହାପରେ ଆଶାୟୀଙ୍କ ମଧ୍ୟରେ ଏତେ ଯୁକ୍ତିତର୍କ ଏବଂ ଗଣ୍ଡଗୋଳ ଘଟିଲା ଯେ, ସେମାନେ ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା କରିପାରିଲେ ନାହିଁ । ସେମାନେ ଭଲ ଭାବେ ଜାଣିଛନ୍ତି, ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା କଲେ ଦଳ ଚାରି ଭାଗ ହୋଇଯିବ ।