ଇଣ୍ଡିଆ ଟିଭି-ସିଏନଏକ୍ସ ଓପନିୟନ୍ ପୋଲ୍
ନୂଆଦିଲ୍ଲୀ/ଭୁବନେଶ୍ୱର: ଏବେ ନିର୍ବାଚନ ହେଲେ ଏନଡିଏ ପୁଣି ଥରେ କେନ୍ଦ୍ରରେ ସରକାର ଗଢ଼ିବ । ନରେନ୍ଦ୍ର ମୋଦୀ ତୃତୀୟ ଥର ପାଇଁ ହେବେ ଦେଶର ପ୍ରଧାନମନ୍ତ୍ରୀ । ସେହିଭଳି ଓଡ଼ିଶାରେ ପୁଣି ସରକାର ଗଢ଼ିବ ବିଜେଡି । ନବୀନ ପଟ୍ଟନାୟକ ଷଷ୍ଠ ଥର ପାଇଁ ମୁଖ୍ୟମନ୍ତ୍ରୀ ହେବେ ।ଇଣ୍ଡିଆ ଟିଭି ଏବଂ ସିଏନଏକ୍ସର ଓପନିୟନ୍ ପୋଲ୍ ଏହି ପୂର୍ବାନୁମାନ କରିଛି । ଏହାର ଆକଳନ ଅନୁଯାୟୀ, ୨୦୨୪ ନିର୍ବାଚନରେ ଏନଡିଏ ମେଣ୍ଟକୁ ୩୧୮ ଆସନ ମିଳିବ । ବିଜେପି ଏକାକୀ ୨୯୦ ଆସନ ପାଇବ । ଅର୍ଥାତ୍ ଗତ ନିର୍ବାଚନ ତୁଳନାରେ ବିଜେପିକୁ ୧୩ ଆସନ କମ ମିଳିବ । ନବଗଠିତ ଇ-ଣ୍ଡି-ଆ ମେଣ୍ଟକୁ ୧୭୫ ଆସନ(କଂଗ୍ରେସ ୬୬) ଏବଂ ଅନ୍ୟାନ୍ୟଙ୍କୁ ୫୦ ଆସନ ମିଳିବ ।ଓଡ଼ିଶା ପାଇଁ ପୂର୍ବାନୁମାନରେ ବିଜେଡି ୪୫ ପ୍ରତିଶତ ଭୋଟ ପାଇ ରାଜ୍ୟରେ ସରକାର ଗଢ଼ିବ । ବିଜେପି ୪୧ ପ୍ରତିଶତ ଏବଂ କଂଗ୍ରେସ ୧୧ ପ୍ରତିଶତ ଭୋଟ ପାଇବ । ଲୋକସଭା କ୍ଷେତ୍ରରେ ବିଜେଡିକୁ ୧୩ଟି ଆସନ ଏବଂ ବିଜେପିକୁ ୮ ଟି ଆସନ ମିଳିବ ବୋଲି ଆକଳନ କରାଯାଇଛି ।ଲୋକସଭା ପୂର୍ବାନୁମାନରେ ବିଜେପି ଓ କଂଗ୍ରେସ ପରେ ମମତା ବାନାର୍ଜୀଙ୍କ ତୃଣମୂଳ କଂଗ୍ରେସକୁ ତୃତୀୟ ସର୍ବାଧିକ ଆସନ ମିଳିବ । ଗତଥର ଟିଏମସି ୨୨ ଆସନ ପାଇଥିଲା ବେଳେ ଏଥର ୨୮ ଟି ଆସନ ପାଇବ । ଆନ୍ଧ୍ରପ୍ରଦେଶରେ ଜଗନ ରେଡ୍ଡୀଙ୍କ ୱାଇଏସଆରକୁ ୧୮ ଆସନ ମିଳିବ । ଗତଥର ୨୨ ଆସନ ପାଇଥିଲା । ଉଦ୍ଧବ ଠାକୁରଙ୍କ ଶିବସେନା(ୟୁବିଟି) ଆସନ ସଂଖ୍ୟା ୬ ରୁ ୧୧ କୁ ବୃଦ୍ଧି ପାଇବ । ଏକନାଥ ସିନେ୍ଧଙ୍କ ଶିବସେନା ଆସନ ସଂଖ୍ୟା ୧୨ ରୁ ୨ କୁ ଖସିଯିବ । ଅରବିନ୍ଦ କେଜ୍ରିୱାଲଙ୍କ ଆମ ଆଦମୀ ପାର୍ଟି ଆସନ ସଂଖ୍ୟା ୧ ରୁ ୧୦କୁ ବୃଦ୍ଧି ପାଇବ ।କର୍ଣ୍ଣାଟକ, ଗୁଜୁରାଟ, ଗୋଆ, ଉତ୍ତରାଖଣ୍ଡ, ହିମାଚଳ ପ୍ରଦେ, ହରିଆନା, ଦିଲ୍ଲୀ, ମଧ୍ୟପ୍ରଦେଶ, ଛତିଶଗଡ଼, ଝାଡ଼ଖଣ୍ଡ ଏବଂ ମଣିପୁରକୁ ଛାଡ଼ି ଉତ୍ତର ପୂର୍ବାଞ୍ଚଳର ୭ଟି ରାଜ୍ୟରେ ବିଜେପି ଭଲ କରିବ ବୋଲି ପୂର୍ବାନୁମାନ କରାଯାଇଛି । ପଶ୍ଚିମବଙ୍ଗ, ତାମିଲନାଡୁ, ମଣିପୁର, ପଞ୍ଜାବ ଏବଂ ବିହାରରେ ଇ-ଣ୍ଡି-ଆ ମେଣ୍ଟଭଲ କରିବ ବୋଲି କୁହାଯାଇଛି ।ତେବେ ଏହି ଓପନିୟନ୍ ପୋଲ୍ ଆକଳନକୁ ଓଡ଼ିଶାର ତିନି ପ୍ରମୁଖ ରାଜନୈତିକ ଦଳ ଗ୍ରହଣ କରିନାହାନ୍ତି । ଲୋକସଭାରେ ୧୩ ନୁହେଁ, ୨୦ ଆସନରେ ଜିତିବୁ ବୋଲି ବିଜେଡି ଦମ୍ଭ ଦେଖାଇଥିବା ବେଳେ ଆମେ ୮ ନୁହେଁ, ଆହୁରି ଅଧିକ ଆସନ ଜିତିବୁ ବୋଲି ବିଜେପି ରାଜ୍ୟ ସଭାପତି ମନମୋହନ ସାମଲ କହିଛନ୍ତି । ପିସିସି ସଭାପତି ଶରତ ପଟ୍ଟନାୟକଙ୍କ ଆକଳନ ହେଉଛି, ଓଡ଼ିଶାରେ କଂଗ୍ରେସକୁ ୮ ରୁ ୧୦ ଲୋକସଭା ଆସନ ମିଳିବ । ୧୯୯୫ ଫଳ ୨୦୨୪ରେ ରିପିଟ୍ ହେବ ବୋଲି ତାଙ୍କର ପୂର୍ବାନୁମାନ ।ରାଜ୍ୟରେ ସରକାର ଗଠନ ନେଇ ବିଜେପି କି କଂଗ୍ରେସ ନେତୃତ୍ୱ କିନ୍ତୁ ସେଭଳି ଦମ୍ଭ ଦେଖାଇନାହାନ୍ତି । ଓଡ଼ିଶାରେ କଂଗ୍ରେସ ଏଥର ନିଶ୍ଚିତ ସରକାର ଗଠନ କରିବ ବୋଲି ଚିରାଚରିତ ଭାଷଣ ମାରିଛନ୍ତି ବରିଷ୍ଠ ବିଧାୟକ ସୁର ରାଉତରାୟ ।